-
-
-
Loading
பிரிட்டனைச் சேர்ந்த பிரபல 'ஸ்கை டைவர்' தாய்லாந்தில் சாகசத்துக்காக 29வது மாடியிலிருந்து குதித்தபோது பாராசூட் விரியாததால் கீழே விழுந்து படுகாயமடைந்து உயிரிழந்தார்.
பிரிட்டனைச் சேர்ந்த பிரபல 'ஸ்கை டைவர்' நதி ஒடின்சன் (33). இவரlg ‘Nathy’s Sky Photography’ என்ற முகநூல் பக்கம் 10 ஆயிரத்துக்கும் மேற்பட்ட பின்தொடர்பாளர்களையும், 5 ஆயிரத்துக்கும் மேற்பட்ட லைக்குகளையும் கொண்டுள்ளது.
இந்நிலையில் நதி ஒடின்சன், கடந்த 27-ம் தேதி தாய்லாந்தின் பட்டாயாவில் உள்ள 29 மாடி அடுக்குமாடி குடியிருப்பின் மேற்பகுதியிலிருந்து பாராசூட்டுடன் கீழே டைவ் அடித்தார்.
அப்போது, அவர் பாராசூட்டை விரிக்க முயன்றார். ஆனால், எதிர்பாராதவிதமாக பாராசூட் விரியவில்லை. இதனால் மிக வேகமாக கீழே விழுந்த நதி ஒடின்சன் தரையில் மோதி படுகாயமடைந்து சம்பவ இடத்திலேயே உயிரிழந்தார்.
இதுகுறித்து அடுக்குமாடி குடியிருப்பு கட்டிட பாதுகாவலர்கள் கூறுகையில், “ஏதே தரையில் விழுந்தது போன்றும் , பலத்த சப்தமும் கேட்டது. உடனடியாக அங்கு ஓடிச்சென்று பார்த்தபோது, ஒரு பெண் அழுதுகொண்டிருந்தார். அப்போதுதான் நதி ஒடின்சன் கீழே விழுந்தது தெரியவந்தது" என்றனர்.
நதி ஒடின்சன் கீழே குதிப்பதை வீடியோ எடுத்துக் கொண்டிருந்த நபரிடம் விசாரணை நடத்தி வருவதாக தாய்லாந்து போலீஸார் தெரிவித்தனர். நதி ஒடின்சனின் முகநூல் பக்கம், தாய்லாந்தின் பல்வேறு இடங்களிலிருந்து 'ஸ்கைடைவிங்', 'பேஸ் ஜம்பிங்' வீடியோக்களை கொண்டுள்ளது.
'ஸ்கைடைவிங்'-கில் சாகசம் புரிந்துவந்த வீரர், பாராசூட் விரியாமல் படுகாயமடைந்து உயிரிழந்த சம்பவம் அவரது நண்பர்கள், முகநூல் பின் தொடர்பாளர்களை அதிர்ச்சியடையச் செய்துள்ளது.
