[X] Close

வாக்காளர்களுக்கு பணம் பட்டுவாடா செய்ததாக புகார்: கனிமொழி, கதிர் ஆனந்தை தகுதியிழப்பு செய்யக்கோரி உயர் நீதிமன்றத்தில் மனு


  • kamadenu
  • Posted: 12 Apr, 2019 14:12 pm
  • அ+ அ-

-கி.மகாராஜன்

வாக்காளர்களுக்கு பணம் வழங்கியதாக எழுந்த புகாரையடுத்து திமுக வேட்பாளர்கள் கனிமொழி, கதிர் ஆனந்த் ஆகியோரை தகுதியிழப்பு செய்யக்கோரி உயர் நீதிமன்ற மதுரைக்கிளையில் மனு தாக்கல் செய்யப்பட்டுள்ளது.

ராமநாதபுரம் கீழச்சிறுபோது கிராமத்தைச் சேர்ந்த வி. அப்துல்லா சேட், உயர் நீதிமன்ற மதுரைக்கிளையில் தாக்கல் செய்த மனு:

"தமிழகத்தில் 39 மக்களவைத் தொகுதிகளுக்கும் ஏப். 18-ல் தேர்தல் நடைபெறுகிறது. மக்களவைத் தேர்தலை சட்டப்படியும், நியாயமான முறையிலும் நடத்த தேர்தல் ஆணையம் உரிய நடவடிக்கை எடுத்து வருகிறது. இதற்காக ஒவ்வொரு தொகுதிகளுக்கும் பறக்கும் படைகள், சிறப்புக் குழுக்களை தேர்தல் ஆணையம் அமைத்துள்ளது. தேர்தலில் தங்களுக்கு சாதகமாக வாக்களிப்பதற்காக வேட்பாளர்கள் சார்பில் வாக்காளர்களுக்கு பணம், பரிசுப் பொருட்கள் வழங்குவதை தடுக்க கடும் நடவடிக்கை எடுக்கப்பட்டுள்ளது.

தூத்துக்குடி தொகுதியில் திமுக வேட்பாளராக, அக்கட்சியின் மாநில மகளிரணி செயலர் கனிமொழி போட்டியிடுகிறார். அவருக்காக கோயில்கள், மக்கள் கூடும் இடங்கள் மற்றும் பிரச்சாரக் கூட்டங்களில்  வாக்காளர்களுக்கு நூதன முறையில் திமுகவினர் பணம் பட்டுவாடா செய்து வருகின்றனர்.

மார்ச் 27-ல் வேப்பலோடை கிராமத்தில் கனிமொழிக்கு ஆரத்தி எடுத்த வாக்காளர்களுக்கு பணம் வழங்கப்பட்டது. இதுதொடர்பாக கனிமொழி மீது வழக்குப் பதிவு செய்யப்பட்டுள்ளது.

இதேபோல் வேலூர் தொகுதியில் போட்டியிடும் திமுக வேட்பாளர் கதிர் ஆனந்த் சார்பிலும் வாக்காளர்களுக்கு பணம் வழங்கப்பட்டு வருகிறது. கதிர்ஆனந்த் வீடு, அவரது ஆதரவாளர்களின் வீடுகளில் வருமான வரித்துறையினர் நடத்திய சோதனையில் கோடிக்கணக்கான ரூபாய் ரொக்கப்பணம் கைப்பற்றப்பட்டது. இதுதொடர்பாக கதிர் ஆனந்த் அவரது ஆதரவாளர்கள் மீது போலீஸார் வழக்குப்பதிவு செய்துள்ளனர்.

கனிமொழி, கதிர் ஆனந்த் ஆகியோரின் செயல்பாடுகள் ஜனநாயகம் மற்றும் தேர்தல் நடைமுறையில் நம்பிக்கை வைத்துள்ள என்னைப் போன்றவர்கள் மத்தியில் தேர்தல் ஆணையத்தின் மீதான நம்பிக்கையை சீர்குலைக்க செய்துள்ளது. இதனால் கனிமொழி, கதிர்ஆனந்த் ஆகியோரை தேர்தலில் போட்டியிடுவதில் இருந்து தகுதியிழப்பு செய்யக்கோரி தேர்தல் ஆணையத்துக்கு 5.4.2019-ல் மனு அனுப்பினேன்.

அந்த மனு அடிப்படையில் கனிமொழி, கதிர்ஆனந்த் ஆகியோரை தகுதியிழப்பு செய்ய உத்தரவிட வேண்டும்"

இவ்வாறு மனுவில் கூறப்பட்டுள்ளது. இந்த மனு விரைவில் விசாரணைக்கு வரவுள்ளது.

போட்டோ கேலரி

Hindu Tamil Thisai - Kindle Edition


[X] Close