-
-
-
Loading
ஐசிசி ஒருநாள் உலகக் கோப்பை கிரிக்கெட் தொடர் கடந்த ஞாயிற்றுக்கிழமை நிறைவடைந்தது. இதில் சிறப்பாக விளையாடிய இந்திய அணி, இறுதிப்போட்டியில் ஆஸ்திரேலியாவிடம் தோல்வியடைந்தது. இது அணி வீரர்கள் மற்றும் இந்திய ரசிகர்களிடையே பெரும் சோகத்தை ஏற்படுத்தியுள்ளது. ஆனால், ஒரே ஆறுதலான விஷயம் இந்திய வீரர்கள் இந்த தொடரில் தங்கள் சிறப்பான ஆட்டத்தை வெளிப்படுத்தினர். பேட்டிங், பந்து வீச்சு என அனைத்திலும் ஜொலித்தனர்.
இந்நிலையில், ஐசிசி வீரர்களுக்கான புதிய தரவரிசை பட்டியலை வெளியிட்டுள்ளது. அதில் பேட்ஸ்மேன்கள் தரவரிசையில் இந்திய வீரர் சுப்மன் கில் தொடர்ந்து முதலிடத்தில் உள்ளார். பாபர் அசாம் 2-வது இடத்தில் நீடிக்கிறார். உலகக் கோப்பை கிரிக்கெட் தொடரில் சிறப்பாக விளையாடி, தொடர் நாயகன் விருதை பெற்ற விராட் கோலி 3-வது இடத்தை பிடித்துள்ளார். தனது அதிரடி ஆட்டத்தால் எதிரணி பந்து வீச்சாளர்களை துவம்சம் செய்த இந்திய அணியின் கேப்டன் ரோகித் சர்மா 4-வது இடத்தில் உள்ளார். பேட்ஸ்மேன்கள் தரவரிசையில் முதல் 4 இடத்திற்குள் 3 இடத்தை இந்திய வீரர்கள் பிடித்துள்ளனர்.
பந்து வீச்சாளர்கள் தரவரிசையில் தென் ஆப்பிரிக்க வீரர் கேசவ் மகாராஜ் முதலிடத்தில் நீடிக்கிறார். ஆஸ்திரேலிய வீரர் ஜோஷ் ஹேசில்வுட் ஒரு இடம் முன்னேறியுள்ளார். இந்திய வீரர்களில் பும்ரா 4-வது இடத்திலும், குல்தீப் யாதவ் 7-வது இடத்திலும், முகமது ஷமி 10-வது இடத்திலும் உள்ளனர். ஆல் ரவுண்டர் தரவரிசையில் வங்கதேச கேப்டன் ஷகிப் அல் ஹசன் மாற்றமின்றி முதலிடத்தில் தொடருகிறார். இதில் இந்திய வீரர் ஜடேஜா 10-வது இடத்தில் உள்ளார் என்பது குறிப்பிடத்தக்கது.
