-
-
-
Loading
இந்திய வீரர் விராட் கோலி டி20 கிரிக்கெட்டின் அபார சாதனை ஒன்றை செய்ய இருக்கிறார். நாளை நடைபெறவுள்ள ஆப்கானிஸ்தான் அணிக்கு எதிரான 3வது டி20 போட்டியில் 6 ரன் எடுத்தால் அவர் மற்றுமொரு முக்கிய சாதனையை செய்வார்.
நட்சத்திர பேட்ஸ்மேன் விராட் கோலி டெஸ்ட் மற்றும் ஒருநாள் போட்டிகளில் பல்வேறு சாதனைகளை நிகழ்த்தி இருக்கிறார். அதேபோல கிரிக்கெட்டின் நவீன வடிவமான டி20யிலும் விராட் கோலி தன் முத்திரையை ஆழமாக பதித்து இருக்கிறார்.
அந்த வகையில் சர்வதேச டி20 போட்டிகள் மற்றும் ஐபிஎல் உள்ளிட்ட பிற உள்ளூர் டி20 போட்டிகளை சேர்த்து ஒட்டு மொத்த டி20 போட்டிகளில் விராட் கோலி இதுவரை 11,994 ரன்கள் குவித்துள்ளார். இன்னும் 6 ரன்கள் குவிக்கும் பட்சத்தில் டி20 போட்டிகளில் 12,000 ரன்கள் குவித்த முதல் இந்திய வீரர் என்ற பெருமையை பெறுவார். மேலும், உலக அளவில் இந்த மைல்கல் சாதனையை செய்யும் நான்காவது வீரர் என்ற பெருமையையும் விராட் கோலி பெறுவார்.
உலக அளவில் இதுவரை கிறிஸ் கெயில் (14,562 ரன்கள்), சோயப் மாலிக் (12,993 ரன்கள்), கீரான் பொல்லார்ட் (12,430 ரன்கள்) அடித்து முதல் மூன்று இடங்களில் உள்ளனர். இவர்களுக்கு அடுத்து விராட் கோலி 12,000 டி20 ரன்கள் குவித்து நான்காம் இடத்தை பெறுவார். இந்த நால்வரில் விராட் கோலி தான் அதிக டி20 பேட்டிங் சராசரி வைத்துள்ளார் என்பது குறிப்பிடத்தக்கது.
நாளை நடைபெறவுள்ள இந்தியா -ஆப்கானிஸ்தான் அணிகள் மோதும் மூன்றாவது டி20 போட்டியிலேயே விராட் கோலி இந்த மைல்கல்லை எட்ட வாய்ப்பு உள்ளது. விராட் கோலி 14 மாத இடைவெளிக்கு பின் சர்வதேச டி20 போட்டிகளில் ஆப்கானிஸ்தானுக்கு எதிரான தொடரில் களமிறங்கியுள்ளார். நாளை கோலியின் மற்றுமொரு சாதனை நிகழும் என்ற உறுதியோடு ரசிகர்கள் உள்ளனர்.
இதையும் வாசிக்கலாமே...
