விண்ணதிர 'அரோகரா' முழக்கம்... பழநியில் பங்குனி தேரோட்டம் கோலாகலம்!

பழநி பங்குனி உத்திரத் திருவிழாவின் முக்கிய நிகழ்வான பங்குனித் தேரோட்டத்தில் ஆயிரக்கணக்கான பக்தர்கள் தேரை வடம்பிடித்து இழுத்து வழிபட்டனர்.

அறுபடை வீடுகளில் மூன்றாம் படை வீடான பழநி முருகன் கோயிலில் பங்குனி உத்திரத் திருவிழா கடந்த 18-ம் தேதி கொடியேற்றத்துடன் தொடங்கியது. பத்து நாட்கள் தொடர்ந்து நடைபெறும் திருவிழாவின் 6-ம் நாளான நேற்று, முத்துகுமாரசுவாமி, வள்ளி, தெய்வானை திருக்கல்யாணம் நிகழ்ச்சி நடைபெற்றது. திருவிழாவின் முக்கிய நிகழ்வான பங்குனி உத்திரத் தேரோட்டம் இன்று நடைபெற்றது.

இன்று மாலை 4 மணிக்கு அருள்மிகு முத்துக்குமாராசாமி, வள்ளி, தெய்வானையுடன், அலங்கரிக்கப்பட்ட திருத்தேரில் பழனி அடிவாரம் வடக்கு கிரிவீதியில் இருந்து, நான்கு கிரிவீதிகளிலும் வலம் வந்து அருள்பாலித்தார். ஆயிரக்கணக்கான பக்தர்கள் வடம் பிடித்து திருத்தேரை இழுக்க, முத்துக்குமாரசாமி-வள்ளி தெய்வயானை சமேதராக‌ தேரில் எழுந்தருளி பக்தர்களுக்கு அருள்பாலித்தார். அப்போது பக்தர்கள் விண்ணதிர அரோகரா முழக்கங்களை எழுப்பினர்.

தேரோட்டத்தில் கோயில் நிர்வாகிகள், பக்தர்கள், உள்ளூர் பிரமுகர்கள் உள்பட ஏராளமானோர் கலந்துகொண்டனர். வருகின்ற 27-ம் தேதி கொடி இறக்க நிகழ்ச்சியுடன் பங்குனி உத்திர திருவிழா நிறைவடைகிறது. தேரோட்டத்தை ஒட்டி, பழனி முருகன் கோயிலில் சிறப்பு பூஜைகள் செய்யப்பட்டது. இதில் ஆயிரக்கணக்கான பக்தர்கள் கலந்து கொண்டு சாமி தரிசனம் செய்தனர்.