தீபாவளியில் புதிய உச்சம்! வாங்கிக் குவித்த மக்கள்... ரூ.3.75 லட்சம் கோடி வியாபாரம்!

இந்த ஆண்டு தீபாவளி பண்டிகையை முன்னிட்டு நேரடி சில்லறை விற்பனை மற்றும் ஆன்லைன் தளங்களில் 3.75 லட்சம் கோடி ரூபாய்க்கு விற்பனை நடைபெற்று இதுவரை இல்லாத புதிய உச்சத்தை எட்டியுள்ளது.

தீபாவளி பண்டிகை காரணமாக இந்தியாவின் சில்லறை சந்தைகளில் ரூ.3.75 லட்சம் கோடி வர்த்தகம் நடைபெற்றுள்ளதாக அகில இந்திய வர்த்தகர்களின் கூட்டமைப்பு தகவல் தெரிவித்துள்ளது. கடந்த ஆண்டு தீபாவளியின்போது இந்தியாவின் சில்லறை சந்தையில் ரூ.2.75 லட்சம் கோடிக்கு விற்பனை நடைபெற்றது.

இந்தமுறை இந்தியாவில் தயாரிக்கப்பட்ட பொருட்களுக்கு முன்னுரிமை அதிகரித்துள்ளது. 1 லட்சம் கோடி ரூபாய் மதிப்பிலான சீனப் பொருட்களின் விற்பனை குறைந்துள்ளது என வர்த்தகர் அமைப்பு தெரிவித்துள்ளது.

தீபாவளி சீசனில் நடைபெற்ற 3.75 லட்சம் கோடி மதிப்பிலான மொத்த விற்பனையில், அதிகபட்சமாக உணவு பொருட்கள் ரூ.48 ஆயிரம் கோடி ரூபாய்க்கு விற்பனையாகியுள்ளது. நகைகள் ரூ.33 ஆயிரம் கோடிக்கும், ஜவுளி மற்றும் ஆடைகள் ரூ.45 ஆயிரம் கோடிக்கும் விற்பனை செய்யப்பட்டுள்ளது. இனிப்பு வகைகள் மற்றும் உலர் பழங்கள் ரூ.15,000 கோடி, அழகு சாதன பொருட்கள் ரூ.22,500 கோடி, மொபைல் போன் உள்ளிட்ட மின்சாதன பொருட்கள் ரூ.30,000 கோடி, பூஜை பொருட்கள் ரூ.11,250 கோடி ரூபாய்க்கும் விற்பனை ஆகியுள்ளன.

இதுதவிர சமையலறை பொருட்கள், பாத்திர, பண்டங்கள் ரூ.11,250 கோடி, பேக்கரி மற்றும் இனிப்பு பொருட்கள் ரூ.7,500 கோடி, பரிசு பொருட்கள் ரூ.30,000 கோடி அளவிலும், மற்ற பொருட்கள் மற்றும் சேவைகள் மூலம் 75 ஆயிரம் கோடி ரூபாய்க்கும் வியாபாரம் நடைபெற்றுள்ளது. குறிப்பாக தீபாவளி தினத்தன்று இந்தியா முழுவதும் ரூ. 5,000 கோடி மதிப்பிலான பூக்கள் மற்றும் ரூ.2,000 கோடி மதிப்பிலான பழங்கள் விற்பனையாகியுள்ளன.

நேரடி சந்தைகளில் மட்டுமின்றி ஆன்லைன் விற்பனை தளங்களிலும் விற்பனை களைகட்டியுள்ளது. குறிப்பாக அமேசான் நிறுவனத்தின் கிரேட் இந்தியன் ஃபெஸ்டிவல் மூலம் வியாபாரத்தில் இதுவரை இல்லாத புதிய உச்சத்தை எட்டியுள்ளது. தங்களது தளத்தில் ஆன்லைன் மூலம் பொருள் வாங்கியவர்களில் 80 சதவீதம் பேர் இரண்டு மற்றும் மூன்றாம் கட்ட நகரங்களை சேர்ந்தவர்கள் என அமேசான் நிறுவனம் தெரிவித்துள்ளது.

இதன் மூலம் முன்னெப்போதும் இல்லாத வகையில் 110 கோடி பயனாளர்கள் அமேசான் தளத்தை அணுகியுள்ளனர். இதனால் அமேசான் தளத்தில் 750க்கும் மேற்பட்ட விற்பனையாளர்கள் கோடிக்கணக்கிலும், 31,000க்கும் மேற்பட்ட விற்பனையாளர்கள் பல லட்சங்களிலும் வியாபாரம் செய்துள்ளனர்.

இது முன்னெப்போதும் இல்லாத புதிய உச்சமாகும். 15 லட்சத்திற்கும் அதிகமான புதிய வாடிக்கையாளர்கள் அமேசானில் உள்ள பிரிவுகளில் தங்களுக்குப் பிடித்த பிராண்டுகளுக்காக முதல் முறையாக ஷாப்பிங் செய்துள்ளனர்.

அடுத்த சில வாரங்களில் கோவர்தன் பூஜை, பயா தூஜ், சத் பூஜை மற்றும் துளசி விழா போன்ற பண்டிகைகள் இருப்பதால், மேலும் 50 ஆயிரம் கோடிக்கு விற்பனை நடைபெற வாய்ப்புள்ளதாகவும் வர்த்தகர் கூட்டமைப்பு நம்பிக்கை தெரிவித்துள்ளது.

இதையும் வாசிக்கலாமே... கவுண்டர் பையனைத்தான் கல்யாணம் கட்டுவோம்; உறுதிமொழி எடுத்த பெண்கள்: திமுக கூட்டணி கட்சி நிர்வாகியால் சர்ச்சை!

HBD Mamta Mohandas|புற்றுநோய் தந்த பயமும்...விட்டிலிகோ தந்த நம்பிக்கையும்!

காதலை ஏற்க காதலன் குடும்பம் மறுப்பு… காதலி மர்மமான முறையில் மரணம்!

உஷார்; தமிழ்நாட்டில் 27 மாவட்டங்களில் கனமழை: ஆட்சியர்களுக்கு வருவாய்த்துறை அவசர கடிதம்!

அதிர்ச்சி: தாத்தா ஓட்டிய காரின் சக்கரத்தில் சிக்கி 2வயது குழந்தை பலி!