[X] Close

குணமா வாய்ல சொல்லனும்!- ஒரு செல்லக் குரல் சொல்லும் மகத்தான சேதி


child-beating-is-wrong

  • பாரதி ஆனந்த்
  • Posted: 10 Sep, 2018 11:31 am
  • அ+ அ-

கடந்த சில தினங்களாக வாட்ஸ் அப்பில் திரும்பத் திரும்ப வந்து கொண்டே இருக்கும் ஒரு வைரல் வீடியோவைப் பற்றியதுதான் இந்த பதிவு. 

ஒரு நிமிடத்துக்கும் குறைவாக ஓடும் அந்த வீடியோவில் சமர்த்தாக சம்மனம் இட்டு அமர்ந்திருக்கும் பெண் குழந்தை அழுது கொண்டே பேசுகிறது.

முதலில் குழந்தையின் தாய், சேட்டைப் பண்றது தப்பா தப்பு இல்லையா? பேச்ச மாத்தாம பதில் சொல்லு எனத் தொடங்க "தப்புதான். அதுக்கு என்ன சொல்லனும். 

தாய்: அதுக்குத்தான் அடிக்கிறது. புரிஞ்சதா? 
குழந்தை: அடிச்சா தப்பு. குணமா வாய்ல சொல்லனும். திட்டாம அடிக்காம வாய்ல சொல்லனும். 
தாய்: அதுக்கு நீ சேட்ட பண்ணாம இருக்கனும். 
குழந்தை: சேட்ட பண்ணாலும் வாய்ல குணமா சொல்லனும். 
தாய்: இப்ப எதுக்கு நீ இப்படி அழுதுக்கிட்டிருக்க சுந்தரிகா. 
குழந்தை: அடிச்சா அழாம என்ன பண்ணுவாங்க நீ சொல்லு. 
தாய்: சேட்ட பண்ணா அடிக்காம என்ன செய்வாங்க நீ சொல்லு. 
குழந்தை: குணமா வாய்ல சொல்லனும்" 

அந்த உரையாடல் இங்கே முடிகிறது.

அந்தக் குழந்தையின் குரல் ரசிப்பதற்காகவும் எவ்வளவு புத்திசாலித்தனமாக பேசுகிறது என பாராட்டுவதற்காக மட்டுமல்ல. சிந்திப்பதற்கும்கூட. வீட்டில் பிள்ளைகளை அடிக்கும் பெற்றோர், பள்ளியில் குழந்தைகளை அடிக்கும் ஆசிரியர்கள் என அனைவருக்குமான பாடம் இந்தப் பிஞ்சுக் குரல்.

தப்பே செய்தாலும்கூட திட்டாமல் அடிக்காமல் குணமாக சொல்ல வேண்டும் என்று அந்தக் குழந்தை கூறுவது அஹிமைசயின் சாராம்சம். பிஞ்சுக் குழந்தைக்கு இயல்பிலேயே அந்தக் குணம் உள்ளே இருக்கிறது. அந்தக் குழந்தையும் ஒரு மகாத்மாவே.

குழந்தைகள் எப்போதும் நாம் சொற்படி நடப்பவர்கள் அல்ல நம்மைப் பார்த்து நமது செய்கைகளைப் பிரதிபலிப்பவர்கள். இது சைல்டு சைக்காலஜிஸ்ட்களின் கூற்று. இன்று நாம், நம்மைவிட வயதில் குறைந்த பலத்தில் குறைந்த நம் குழந்தைகளை அடித்தால் நாளை அந்தக் குழந்தை சக குழந்தையை அடிப்பது தவறல்ல. வன்முறை தவறல்ல. எளியோரை அடிப்பது தவறல்ல எனப் புரிந்து கொள்ளும். எதிர்காலத்தில் வன்முறையை சகஜமான உணர்வாக ஏற்றுக் கொள்ளும்.

பொதுவாக பிள்ளைகளை அடிக்கும் பெற்றோர் தண்டனை கொடுத்த அந்த நிமிடத்தில் அவர்களுக்கு ஏதோ பெரிய நிவாரணம் கிடைத்ததைப் போல் உணர்வார்கள். முதலில் அந்த நிவாரணம் குழந்தை மீதான கோபத்தைப் போக்கியதால் கிடைத்ததா இல்லை வேறு ஒரு விரக்தியினை இப்படித் தீர்த்துக் கொண்டதால் கிடைத்ததா என்பதை உணர வேண்டும். பெரும்பாலும் பெரியவர்களின் ஏதோ ஒரு கோபத்துக்கு தான் குழந்தைகள் ஆளாகின்றனர். 

அப்போது குழந்தைகளும் தங்களுக்கு அழுத்தம் இருந்தால் அதை வேறு ஒருவரிடம் பழிதீர்க்கும் பழக்கத்தைக் கற்றுக்கொள்கிறது. முதலில் வன்முறை தவறு என்பதை வளர்ந்த நபர்கள் புரிந்து கொள்ள வேண்டும்.

குழந்தைகள் தவறு செய்வது இயல்புதான். அதுவும் அவர்கள் நாம் சொன்னவுடன் அப்படியே கேட்டு நிச்சயம் நடக்கமாட்டார்கள்தான். அதற்காக அடிப்பது என்பது வன்முறை. அப்புறம் எப்படித்தான் கையாள்வது என்கிறீகளா? பொறுமையும், நிதானமும் தேவை. குழந்தைகளுடம் நேரத்தை செலவழிக்க வேண்டும். அவர்களிடம் அதிகமாக பேச வேண்டும். அவர்கள் செய்வது ஏன் தவறு என்பதை உணர்த்த வேண்டும். இது ஒரே இரவில் நடந்துவிடாது. நீண்ட காலமாகும். இதுதான் குழந்தை வளர்த்தல் முறை.

இதைத்தான் அந்தக் குழந்தை அடிக்காம திட்டாம வாய்ல குணமா சொல்லணும் எனக் கூறுகிறது.

எந்தக் குழந்தையும் நல்ல குழந்தைதான் மண்ணில் பிறக்கையிலே.. அது நல்லவர் ஆவதும் தீயவர் ஆவதும் பெற்றோர் வளர்ப்பினிலே என்பதை உணர்ந்து வளர்க்க வேண்டும்.

போட்டோ கேலரி

Therkil Irunthu Oru Suriyan - Kindle Edition


[X] Close