பிஜேடி தலைவர் பதவிக்கு 9 வது முறையாக நவீன் பட்நாயக் வேட்புமனு தாக்கல்!

பிஜு ஜனதா தளம் (பிஜேடி) தலைவர் பதவிக்கு ஒடிசா சட்டப்பேரவை எதிர்க்கட்சித் தலைவரும் முன்னாள் முதல்வருமான நவீன் பட்நாயக் நேற்று வேட்புமனு தாக்கல் செய்தார்.

1997-ல் பிஜேடி தொடங்கப்பட்டதில் இருந்து அதன் தலைவராக நவீன் பட்நாயக் தொடர்ந்து 8 முறை தேர்ந்தெடுக்கப்பட்டுள்ளார். இந்நிலையில் 9-வது முறையாக அப்பதவிக்கு அவர் நேற்று புவனேஸ்வரில் உள்ள தனது கட்சி அலுவலகத்தில் வேட்புமனு தாக்கல் செய்தார். தனது தந்தை பிஜு பட்நாயக்கின் 28-வது நினைவு நாளில் அவர் வேட்புமனு தாக்கல் செய்துள்ளார். அவரைத் தவிர வேறு எவரும் இப்பதவிக்கு மனுத் தாக்கல் செய்யவில்லை.

பின்னர் செய்தியாளர்களிடம் நவீன் பட்நாயக் பேசும்போது, “2000 முதல் 2024 வரையிலான பிஜேடி ஆட்சியில் ஒடிசா குறிப்பிடத்தக்க வளர்ச்சி அடைந்துள்ளது. தேசிய மற்றும் சர்வதேச அளவில் ஒடிசாவுக்கு அங்கீகாரத்தை பெற்றுத்தந்தது. இப்போது சிலர் (பாஜகவினர்) நமது பங்களிப்பு மற்றும் தியாகத்தை இழிவுபடுத்த முயற்சி செய்கின்றனர். ஆனால் யாருடைய விருப்பப்படியும் வரலாற்றை மாற்ற முடியாது என்பதை அவர்கள் நினைவில் கொள்ள வேண்டும்” என்றார்.