[X] Close

ரூ.1000 கோடி வருமானம் ஈட்டிய பாஜக; கணக்கு தெரிவிக்காத காங்கிரஸ்


bjp-declares-rs-1-000-crore-income-congress-data-awaited

  • போத்திராஜ்
  • Posted: 18 Dec, 2018 11:56 am
  • அ+ அ-

புதுடெல்லி, ஐஏஎன்எஸ்

கடந்த 2017-18-ம் நிதி ஆண்டில், பாஜகவின் வருமானம் ரூ.ஆயிரத்து 27 கோடியாகவும், ரூ.758 கோடி செலவு செய்ததாகவும் அந்த கட்சி தேர்தல் ஆணையத்திடம் தெரிவித்துள்ளது.

தேர்தல் ஆணையத்திடம் தேசியக் கட்சிகள், மாநில அரசியல் கட்சிகள் 2017-18-ம் ஆண்டுக்குரிய வருமானம், செலவு கணக்கு ஆகியவற்றின் விவரங்களைத் தாக்கல் செய்துள்ளனர். அந்தக் கணக்குகளை, ஜனநாயக சீர்திருத்துக்கான அமைப்பு(ஏடிஆர்) ஆய்வு செய்து வெளியிட்டுள்ள அறிக்கையில் கூறியிருப்பதாவது:

கடந்த 2017-18-ம் நிதிஆண்டில் பாஜக கட்சி தங்களுக்கு ரூ. ஆயிரத்து 27.339 கோடி வருவமானம் வந்துள்ளதாகக் கணக்கு அளித்துள்ளது. அதேசமயம், ரூ.758.47 கோடி செலவு செய்துள்ளதாகவும் தெரிவித்துள்ளது. கடந்த 2016-17-ம் ஆண்டின் வருமானத்தோடு ஒப்பிடுகையில் பாஜகவுக்கு வருமானம் ரூ.7 கோடி குறைந்துள்ளது.

காங்கிரஸ் கட்சி கடந்த 2017-18-ம் ஆண்டுக்கான வருமானம் குறித்த அறிக்கையைத் தேர்தல் ஆணையத்திடம் தாக்கல் செய்யவில்லை.

மார்க்சிஸ்ட் கம்யூனிஸ்ட் கட்சி தங்களுக்கு 2017-18-ம் ஆண்டில் ரூ.104.847 கோடி வருமானம் வந்துள்ளதாகவும், ரூ.83.482 கோடி செலவு செய்துள்ளதாகவும் தெரிவித்துள்ளது.

அதைத் தொடர்ந்து மாயாவதி தலைமையிலான பகுஜன் சமாஜ் கட்சி 2017-18-ம் ஆண்டில் ரூ.51.694 கோடி வருமானம் வந்துள்ளாகவும், ரூ.14.87 கோடி செலவு செய்துள்ளதாகவும் தெரிவித்துள்ளது.

சரத்பவார் தலைமையிலான தேசியவாத காங்கிரஸ் கட்சி தங்களுக்கு ரூ.8.15 கோடி வருமானம் வந்ததாகவும், ரூ.8.84 கோடி செலவு செய்துள்ளதாகவும் தெரிவித்துள்ளார். ஏறக்குறைய ரூ.69 லட்சம் கடந்த நிதியாண்டில் வருமானத்துக்கு அதிகமாக அவரின் கட்சி செலவிட்டுள்ளதால், கடந்த ஆண்டு தேசியவாத காங்கிரஸ் கட்சி என்ன ஈட்டியது எனத் தெரியவில்லை.

மம்தா பானர்ஜி தலைமையிலான திரிணாமுல் காங்கிரஸ் கட்சி 2017-18-ம் ஆண்டில் ரூ.5.167 கோடி வருமானமும், இந்தியக் கம்யூனிஸ்ட் கட்சி ரூ.1.55 கோடி வருமானமும் வந்துள்ளதாகத் தெரிவித்துள்ளது.

காங்கிரஸ் கட்சி கடந்த 2016-17-ம் ஆண்டில் ரூ.255.36 கோடி வருமானம் வந்துள்ளதாகத் தெரிவித்தது. ஆனால் இந்த 2017-18-ம் ஆண்டு கணக்கை இன்னும் அந்தக் கட்சி தேர்தல் ஆணையத்திடம் தாக்கல் செய்யவில்லை.

போட்டோ கேலரி

Hindu Tamil Thisai - Kindle Edition


[X] Close