இமாச்சலில் 1,200 அரசுப் பள்ளிகள் மூடல் முதல் உச்ச நீதிமன்ற நீதிபதி ராஜினாமா வரை: டாப் 5 விரைவுச் செய்திகள்

காஷ்மீரில் நடந்தது என்ன?: காஷ்மீரில் கடந்த 3 நாட்களில் மேற்கொள்ளப்பட்ட 2 முக்கிய நடவடிக்கைகளில் 6 பயங்கரவாதிகள் கொல்லப்பட்டதாக பாதுகாப்புப் படையினர் தெரிவித்துள்ளனர்.மேலும், காஷ்மீரில் எந்தவொரு பயங்கரவாத நடவடிக்கையையும் முடிவுக்குக் கொண்டுவருவது எங்கள் கடமையாகும் எனத் தெரிவித்துள்ளனர்.

இமாச்சலில் இரண்டரை ஆண்டுகளில் 1,200 அரசுப் பள்ளிகள் மூடல்: கடந்த இரண்டரை ஆண்டுகளில் இமாச்சலப் பிரதேசத்தில் மொத்தம் 1,200 பள்ளிகள் மூடப்பட்டுள்ளதாக அம்மாநில கல்வி அமைச்சர் ரோஹித் தாக்கூர் தெரிவித்தார். மேலும், மாநில அரசின் கல்வித் துறையை வலுப்படுத்த பல முக்கியமான முடிவுகள் எடுக்கப்பட்டு வருகிறது. தேவைப்பட்டால் பள்ளிகளை இணைப்பது மற்றும் மறுசீரமைப்பது குறித்தும் பரிசீலிக்கப்பட்டு வருகிறது எனத் தெரிவித்துள்ளார்.

உச்ச நீதிமன்ற நீதிபதி பேலா எம்.திரிவேதி ராஜினாமா: உச்ச நீதிமன்ற நீதிபதி பேலா எம்.திரிவேதி தனது பதவியை ராஜினாமா செய்தார். இதன்மூலம், உச்ச நீதிமன்றத்தின் 75 ஆண்டு கால வரலாற்றில் பதவியை ராஜினாமா செய்த 7-வது பெண் நீதிபதி ஆகிறார். உச்ச நீதிமன்றத்தின் 11-வது பெண் நீதிபதியான அவர், மூன்றரை ஆண்டுகள் உச்ச நீதிமன்ற நீதிபதியாக பணியாற்றிய நிலையில், தனிப்பட்ட காரணங்களுக்காக பதவியை ராஜினாமா செய்வதாக தெரிவித்துள்ளார்.

மழைக் காலத்தில் கூடுதல் கட்டணம் விதித்த ஜொமோட்டோ, ஸ்விக்கி!: ஜொமோட்டோ மற்றும் ஸ்விக்கி உணவு டெலிவரி நிறுவனங்கள் மூலம் மழைக்காலங்களில் உணவு ஆர்டர் செய்யும்போது இனி கூடுதல் கட்டணங்கள் செலுத்த வேண்டும் என்ற அறிவிப்பு வெளியாகியுள்ளது. இதன்படி இன்று முதல் (வெள்ளிக்கிழமை), மழைக் காலத்தின் போது கோல்டு உறுப்பினர்களுக்கு இனி சர்ஜ் கட்டணங்களிலிருந்து விலக்கு அளிக்கப்பட மாட்டாது.

பாகிஸ்தான் மீது இன்னும் கடும் நடவடிக்கை: சித்தராமையா; பஹல்காம் பயங்கரவாத தாக்குதலைத் தொடர்ந்து, பயங்கரவாதிகளை ஒழிக்கவும், எதிர்காலத்தில் பாகிஸ்தான் அவர்களுக்கு ஆதரவளிக்காமல் இருக்கவும் இந்தியா இன்னும் கடுமையான நடவடிக்கைகளை எடுத்திருக்க வேண்டும். தேசிய பாதுகாப்பு என்று வரும்போது, ​​யாராவது நம்மைத் தூண்டும்போது, ​​நாம் அமைதியாக இருக்க முடியாது. நாம் போர் தொடுக்க வேண்டும் என்று கர்நாடக முதல்வர் சித்தராமையா தெரிவித்துள்ளார்.