‘நானும் இறந்திருக்கலாம்’ என கண்ணீர் - ஆபரேஷன் சிந்தூர் தாக்குதலில் மசூத் அசாரின் குடும்பத்தினர் 10 பேர் பலி!

புதுடெல்லி: இந்தியா நடத்திய ஆபரேஷன் சிந்தூர் தாக்குதல்களில் ஜெய்ஷ்-இ-முகமது அமைப்பின் தலைவர் மசூத் அசாரின் குடும்பத்தினர் 10 பேர் மற்றும் 4 உதவியாளர்கள் கொல்லப்பட்டுள்ளனர்.

பஹல்காம் படுகொலைக்கு பதிலடியாக இந்திய ராணுவம் நடத்திய 'ஆபரேஷன் சிந்தூர்' தாக்குதலில் தனது குடும்பத்தைச் சேர்ந்த 10 பேர் மற்றும் நான்கு உதவியாளர்கள் கொல்லப்பட்டதாக ஜெய்ஷ்-இ-முகமது தலைவர் மசூத் அசார் கூறியதாக தனியார் செய்தி நிறுவனம் தகவல் வெளியிட்டுள்ளது.

பாகிஸ்தான் மற்றும் பாகிஸ்தான் ஆக்கிரமிப்பு காஷ்மீரில் உள்ள ஜெய்ஷ், லஷ்கர்-இ-தொய்பா மற்றும் ஹிஸ்புல் முஜாஹிதீன் ஆகியவற்றுடன் தொடர்புடைய ஒன்பது பயங்கரவாத முகாம்களை நேற்று நள்ளிரவில் இந்தியா தாக்கியது.

பாகிஸ்தானின் பஹவல்பூரில் உள்ள சுப்ஹான் அல்லா காம்ப்ளக்ஸ் மசூதியில் இந்திய ராணுவம் நடத்திய 'ஆபரேஷன் சிந்தூர்' தாக்குதலில் ஜெய்ஷ்-இ-முகமது தலைவர் மசூத் அசாரின் மூத்த சகோதரி மற்றும் அவரது கணவர், அவரது மருமகன் மற்றும் அவரது மனைவி, மற்றொரு மருமகள் மற்றும் அவரது குடும்பத்தின் ஐந்து குழந்தைகள் என 10 பேர் கொல்லப்பட்டனர்.

மேலும், இந்த தாக்குதல்களில் அசாரின் நெருங்கிய உதவியாளர் மற்றும் அவரது தாயாரின் நெருங்கிய கூட்டாளி மற்றும் இரண்டு நெருங்கிய கூட்டாளிகளும் கொல்லப்பட்டனர். ஆபரேஷன் சிந்தூர் தாக்குதலுக்குப் பிறகு, சோகமடைந்த மசூத் அசார், இந்தத் தாக்குதலில் நானும் கொல்லப்பட்டிருந்தால் நன்றாக இருந்திருக்கும் என்று சோகத்துடன் கூறியுள்ளார்.

பஹாவல்பூர் பாகிஸ்தானின் 12வது பெரிய நகரமாகும், இது லாகூரிலிருந்து 400 கி.மீ தொலைவில் அமைந்துள்ளது. சுப்ஹான் அல்லா காம்ப்ளக்ஸ் மசூதி அமைந்துள்ள இந்த இடத்தில் நடத்தப்பட்ட தாக்குதல் காரணமாக இப்பகுதி இடிபாடுகளாக மாறியுள்ளது. 18 ஏக்கர் பரப்பளவில் பரந்து விரிந்துள்ள இந்த மசூதி வளாகம், உஸ்மான்-ஓ-அலி வளாகம் என்றும் அழைக்கப்படுகிறது. இது ஜெய்ஷ் இ முகமதுவின் ஆட்சேர்ப்பு, நிதி திரட்டுதல் மற்றும் போதனைகளுக்கான மையமாக செயல்படுகிறது.

இந்தத் தாக்குதலில் முரிட்கேயில் உள்ள மஸ்ஜித் வா மர்காஸ் தைபா மசூதியும் தாக்கப்பட்டது. இது ஜெய்ஷ் இ முகமதுவின் மற்றொரு கோட்டையாகும். இந்தியத் தாக்குதல்களில் பஹாவல்பூர் மற்றும் முரிட்கேவில் தலா 30 பயங்கரவாதிகள் கொல்லப்பட்டனர். மற்ற இடங்களில் கொல்லப்பட்ட பயங்கரவாதிகளின் எண்ணிக்கையை அதிகாரிகள் உறுதிப்படுத்தி வரும் நிலையில், 70 முதல் 80 பேர் வரை கொல்லப்பட்டதாக கூறப்படுகிறது. இந்த துல்லியமான தாக்குதல்கள் இன்று அதிகாலை 1.05 மணி முதல் அதிகாலை 1.30 மணி வரை 25 நிமிடங்கள் நீடித்தன என்றும் தெரிவிக்கப்பட்டுள்ளது.