-
-
-
Loading
5 வயது சிறுமியை சாக்லேட் ஆசைக்காட்டி பாலியல் பலாத்கார செய்த பாதகன், தனது அடையாளம் வெளிப்படாது இருக்க, சிறுமியின் கழுத்தை அறுத்து கொன்றுள்ளான். ஒடிசா மாநிலம் புவனேஸ்வரில் இந்த கோர சம்பவம் நடந்துள்ளது.
புவனேஸ்வரின் புறநகர்ப்பகுதியில் ஏர்ஃபீல்ட் காவல் நிலைய எல்லைக்குட்பட்ட சுந்தர்பாடா பகுதியில் உள்ள கேலா சாஹியில் நேற்று, சிறுமி தனது வீட்டில் தனியாக இருந்தபோது இந்தச் சம்பவம் நடந்துள்ளது. பாலியல் பலாத்காரம் மற்றும் கொலையை நிகழ்த்திய ஆண் அதே பகுதியை சேர்ந்தவர் எனவும் சொல்லப்படுகிறது.
நேற்று மாலை வேலை முடிந்து வீடு திரும்பிய சிறுமியின் பெற்றோர், குழந்தையை காணவில்லை என தேட ஆரம்பித்தனர். குடியிருப்பிலும், பக்கத்து தெருக்களிலும் நள்ளிரவு வரை தேடிக் களைத்தவர்கள், இறுதியாக தங்கள் வீட்டின் கட்டிலுக்கு அடியில் சிறுமியின் சடலத்தை அடையாளம் கண்டு கதறினர்.
போலீஸார் விசாரணையில் அப்பகுதியில் அதிகம் அறியப்படாத ஆனால் அவ்வப்போது தென்படும் ஆண் ஒருவர் மீது சந்தேகம் படிந்துள்ளது. குற்றம் சாட்டப்பட்டவருடன் சிறுமி தனது கடைக்கு சாக்லேட் வாங்க வந்ததாக, அப்பகுதியில் உள்ள கடை உரிமையாளர் தெரிவித்திருக்கிறார். தொடர் விசாரணையில் சிறுமியின வீட்டருகே அந்த நபர் நீண்ட நாட்களாக நோட்டமிட்டதை சிலர் பார்த்துள்ளனர்.
இதனையடுத்து , சந்தேக நபரை பிடிக்க தனிப்படை அமைக்கப்பட்டுள்ளதாக ஏர்ஃபீல்ட் காவல்நிலைய போலீஸார் இன்று தெரிவித்தனர். சிறுமியின் சடலம் பிரேத பரிசோதனைக்கு அனுப்பி வைக்கப்பட்டுள்ளது. சிறுமியின் வீட்டிலிருந்து கூடுதல் ஆதாரங்களை சேகரிக்க தடயவியல் துறையினர் களமிறங்கி உள்ளனர்.
5 வயது சிறுமிக்கு சாக்லேட் ஆசைக்காட்டி, சிறுமியின் வீட்டில் வைத்தே பாலியல் பலாத்காரம் செய்ததுடன், கழுத்தறுத்து கொன்ற சம்பவம் ஒடிசாவை அதிர்ச்சிக்குள்ளாக்கி உள்ளது.
