‘குட் பேட் அக்லி’ வசூல் ரூ.170 கோடியை கடந்து புதிய சாதனை!

அஜித்தின் ‘குட் பேட் அக்லி’ திரைப்படம் ரிலீஸான முதல் 5 நாட்களில், உலக அளவில் ரூ.170 வசூலை தாண்டி புதிய சாதனை படைத்துள்ளது.

மைத்ரி மூவி மேக்கர்ஸ் நிறுவனம் தயாரித்துள்ள ‘குட் பேட் அக்லி’ படத்தில் அஜித், த்ரிஷா, பிரசன்னா, சுனில், அர்ஜுன் தாஸ், பிரபு, யோகி பாபு, சைன் டாம் சாக்கோ உள்ளிட்ட பலர் நடித்துள்ளனர். ஆதிக் ரவிச்சந்திரன் இயக்கியுள்ள இப்படம் ஏப்.10-ம் தேதி அன்று திரையரங்குகளில் வெளியானது.

கலவையான விமர்சனங்களை பெற்றாலும் கூட, திரையரங்குகளில் வசூலை வாரிக் குவித்து வருகிறது ‘குட் பேட் அக்லி’. முழுக்க முழுக்க அஜித் ரசிகர்களுக்கான நாஸ்டால்ஜியா அம்சங்களுடன் அவரது பல படங்களின் ரெஃபரன்ஸ்களை உள்ளடக்கிய இந்தப் படம், நீண்ட நாட்களுக்குப் பிறகு அவரது ரசிகர்களுக்கு நல்ல தீனியாக அமைந்துள்ளது.

இப்படம் வெளியான முதல் 5 நாட்களில் மட்டும் உலக அளவில் ரூ.171.50 கோடி வசூலை ஈட்டியுள்ளது. தமிழகத்தில் மட்டும் ரூ.100 கோடி வசூலை கடந்துள்ளது. வெளிநாடுகளில் மட்டும் ரூ.52.15 கோடியை ஈட்டியுள்ளது. இதன் மூலம் 2025-ம் ஆண்டில் இதுவரை ரிலீஸான தமிழ்ப் படங்களிலேயே வசூலில் டாப் இடத்தைப் பிடித்துள்ளது ‘குட் பேட் அக்லி’.

முன்னதாக, அஜித்தின் ‘விடாமுயற்சி’ ஒட்டுமொத்தமாக ரூ.136 கோடியை ஈட்டியிருந்தது. அதற்கு முன்பு பிரதீப் ரங்கநாதனின் ‘டிராகன்’ மொத்த வசூலான ரூ.152 கோடியை தற்போது ‘குட் பேட் அக்லி’ வெறும் 5 நாட்களில் எளிதாக தாண்டியுள்ளது குறிப்பிடத்தக்கது.