[X] Close

‘96’ பார்க்கும் போது கண்ணீர் வழிந்து கொண்டேயிருந்தது: இயக்குநர் வசந்தபாலன்


vasantha-balan-praises-96-movie

  • kamadenu
  • Posted: 21 Oct, 2018 22:07 pm
  • அ+ அ-

‘96’ பார்க்கும் போது கண்ணீர் வழிந்து கொண்டேயிருந்தது என்று இயக்குநர் வசந்தபாலன் தனது ஃபேஸ்புக் பதிவில் தெரிவித்திருக்கிறார்.

ப்ரேம்குமார் இயக்கத்தில் விஜய்சேதுபதி, த்ரிஷா உள்ளிட்ட பலர் நடிப்பில் வெளியான படம் ‘96’. நந்தகோபால் தயாரிப்பில் இப்படம் வெளியானது. இப்படம் வெளியாவதற்கு முன்பே பாடல்கள் இளைஞர்கள் மத்தியில் பெரும் வரவேற்பைப் பெற்றது.

படம் வெளியான பிறகு விமர்சன ரீதியாகவும், வசூல் ரீதியாகவும் நல்ல வரவேற்பைப் பெற்றது. இப்படம் தொடர்பாக பலரும் தங்களுடைய கருத்துகளை வெளியிட்டு வருகிறது. ‘96’ தொடர்பாக இயக்குநர் வசந்தபாலன் தனது ஃபேஸ்பு பதிவில் கூறியிருப்பதாவது:

'96' திரைப்படத்தைப் பார்க்கும் வாய்ப்பு கிடைத்தது. அது நேர்ந்து விடக்கூடாதுன்னு தான் படத்தைப் பார்க்காமல் தள்ளிப்போட்டு வந்தேன். மெதுவாக என் பள்ளி நாட்கள். கூச்சமுள்ள பையனான என்னை விஜய் சேதுபதியாக பார்த்தேன். அவ்வளவு தான் கால்கள் தரையில் இல்லை. ஆழ்மனதியானத்தில் மூழ்கி விட்டேன். கண்ணீர் வழிந்து கொண்டேயிருந்தது.

ஜானு ராமை நெஞ்சில் தொடும் போது என் பிபி ஏறத் தொடங்கியது. நீ இன்னும் வெர்ஜினா என்று கேட்டபோது 34 வயது வரையான என் திருமணம் ஆகாத வாழ்வை எண்ணிக்கொண்டேன். இளையராஜாவின் பாடல்களை ஜானு பாடும் போது என் ஆன்மா எங்கோ கேவி கேவி அழத் தொடங்கிவிட்டது. எவ்வளவு மன நெருக்கடியில் இந்த மனசு தவித்தது.ஒரு ஆன்ம விடுதலை. மெய் மயக்கம்.

திரையில் என்னை நான் பார்த்தேன். பெண்ணைத் தொடுவதில் ஒரு மயக்கம் உள்ளது, ஆனால் பெண்ணை தொடாமல் நாக்குக்கடியில் மனதின் மர்மப்பிரதேசத்தில் அந்த நினைவுகளை உருட்டிக்கொண்டு இருப்பதில் உள்ள மகிழ்ச்சி பேரானந்தம்.. விளக்க முடியா உணர்வு...அது தான் பெரு மயக்கம். திரையில் படம் முடிந்த போது நான் என் 92 களில் பயணிக்கத் தொடங்கிவிட்டேன்.
நன்றி விஜய் சேதுபதி, த்ரிஷா, பிரேம், இளையராஜா சார்........ ஷம்மி.... படத்தின் தொடக்கக் காட்சிகளில் வரும் ஒளிப்பதிவு மிக அருமை ஷண்முக சுந்தரம், மகேந்திரன் இருவருக்கும் என் வாழ்த்துகள்.

மிக குறைவான வார்த்தைகளில் மிக அழுத்தமான நடிப்பால் 80களின் தமிழ் இளைஞனை திரையில் கொண்டு வந்து நிறுத்திய விஜய் சேதுபதிக்கு வாழ்த்துகள். பெரும்பான்மையான தமிழ் இளைஞன் மௌனராகம் கார்த்திக் இல்லை....தாழ்வு மனப்பான்மையில் பெண்ணிடம் (காதலியிட்ம்) பேச கூசுகிற ஒருவன்.. பெண்ணின் கண்ணை பார்க்க வெட்கப்படுகிறவன் அதை மிக அழுத்தமாக இந்த திரைப்படம் பதிவு செய்துள்ளது.

த்ரிஷாவின் நடிப்பை அழகை 'விண்ணைத்தாண்டி வருவாயா' திரைப்படம் ஒரு விதமாய் வெளிப்படுத்தியது. '96' அதன் உச்சத்திற்கு எடுத்துச் சென்று விட்டது. த்ரிஷாவின் நடிப்பு கெரியரில் இது மிக முக்கியமான திரைப்படம். பாடலுக்கு நடனமாடாத த்ரிஷாவை பார்ப்பது எத்தனை மகிழ்ச்சி. த்ரிஷாவுக்கு இந்த திரைப்படத்தில் மொத்தம் இரண்டே இரண்டு சுடிதார்கள். இதுவே பெரும் புரட்சி.

பிரேம் உங்கள் ஆன்மாவின் கதையை அந்த கனவு விலகாமல் எழுதி நீங்கள் கனவு கண்ட சினிமாவை எடுத்து வெற்றி கண்டு உள்ளீர்கள். அழுத்தமான வரவேற்பு கை குலுக்கல்

இவ்வாறு வசந்தபாலன் கூறியுள்ளார்

வாக்களிக்கலாம் வாங்க

'கேம் ஓவர் ' உங்கள் ஸ்டார் ரேட்டிங் என்ன?

போட்டோ கேலரி

Hindu Tamil Thisai - Kindle Edition


[X] Close