[X] Close
 

இத்துடன் நான் திருடிய பணத்தை வட்டியுடன் அனுப்பியிருக்கிறேன்!- ஒரு நெகிழ்ச்சிக் கடிதம்


years-after-she-stole-money-from-a-restaurant-former-waitress-writes-an-apology-letter

  • பாரதி ஆனந்த்
  • Posted: 02 Aug, 2018 14:45 pm
  • அ+ அ-

நம் வாயிலிருந்து வரும் வார்த்தைகளைவிட வலிமையானவை மனம் திறந்து எழுதப்படும் கடிதத்தின் வரிகள். காரணம் அதில் ஒரு நேர்மை இருக்கும்.  அதானால்தான் கடிதங்கள் வரலாறாக மாறிவிடுகின்றன. அரசியல் தலைவர்கள் எழுதிய கடிதத்தை நாம் போற்றிப் பேணுவதில்லையா?! அதுகூட வார்த்தைகளின் வலிமையால்தான்.

அந்த வகையில் அமெரிக்காவில் தற்போது ஒரு கடிதம் இணைய உலகில் வைரலாகி அனைவரையும் நெகிழச் செய்து வருகிறது. 

அமெரிக்காவின் அரிசோனா மாகாணத்தில் உள்ள மெக்சிகோ நாட்டைச் சேர்ந்த உணவகத்தில் வேலை பார்த்துவந்த ஊழியர் ஒருவர் 20 ஆண்டுகளுக்கு முன் அந்தக் கடையில் இருந்து தான் திருடிய பணத்தை கடை முதலாளிக்கு வட்டியும் முதலுமாக அனுப்பியிருக்கிறார்.

அரிசோனாவின் டக்ஸோன் நகரில் கார்லோட்டா ஃப்ளோரஸ் என்பவர் எல் சார்ரோ என்ற மெக்சிகோ உணவகத்தை நடத்தி வந்தார். கடந்த வாரம் அவருக்கு வந்த கடிதம் ஒன்று அவரை நெகிழச் செய்துள்ளது.

அந்தக் கடிதத்தை உடனே தனது ட்விட்டரில் பகிர்ந்த கார்லோட்டா, "ஒரு காரியத்தை செய்வதால் இரண்டு பேருக்கு நன்மை கிடைக்கும் எனும்போது அந்தக் காரியத்தை செய்பவர் தனது அடையாளத்தைத் தெரிவிக்க வேண்டும் என்ற தேவையில்லை. எங்கள் வாரத்தை இந்தக் கடிதம் இனிதாக்கியுள்ளது. honestyisthebestpolicy #makeamends #behonest #nevertoolate #thankful" எனப் பதிவிட்டிருக்கிறார்.

அந்தக் கடிதத்துடன் 1000 டாலர் பணமும் இருந்துள்ளது. அந்த நபர் எழுதிய கடிதத்தில் தன்னை ஒரு பெண் என்பதை மட்டும் அடையாளப்படுத்தியிருக்கிறார்.

அந்தக் கடிதத்தில் விவரம்:
நான் உங்கள் உணவகத்தில் 1990-களில் சில காலம் வேலை செய்தேன். என்னுடன் பணியாற்றிய சக ஊழியரின் உந்துதலின் பேரில் கடைப் பணத்தைத் திருடினேன். நான் பால்ய பருவத்தில் தேவாலயத்தில்தான் வளர்ந்தேன். அப்போதெல்லாம் நான் பணம் திருடியதில்லை. உங்கள் ஹோட்டலில் திருடிய பின் இதுநாள் வரை நான் வேறு எங்கும் எப்பொழுதும் திருட்டில் ஈடுபட்டதில்லை. 

ஆனால், என்னை நீங்கள் அடையாளம் கண்டு பணி நீக்கம் செய்தீர்கள். 20 ஆண்டுகள் கடந்து விட்டன. இப்போதும்கூட அந்த திருட்டு சம்பவத்தை நினைத்து நான் வருந்துகிறேன். உங்களிடமிருந்து திருடியதற்கு வருந்துகிறேன். என்னை மன்னிக்கவும். எனது மன்னிப்புக் கடிதத்தை ஏற்றுக் கொள்ளுங்கள். இத்துடன் நான் திருடிய பணத்தை வட்டியுடன் அனுப்பியுள்ளேன். உங்களையும் உங்களது குடும்பத்தாரையும் இறைவன் எப்போதும் ஆசிர்வதிக்கட்டும்" என நெகிழ்ச்சியாக எழுதியிருக்கிறார்.



Kalathin Vasanai - Kindle Edition


[X] Close