[X] Close

”எனது தங்கை எந்த தவறும் செய்யவில்லை...அவள் அப்பாவி.. சூழ்நிலை என்னவாக இருந்தாலும்  இதற்கான பதிலடியை அல்லா கொடுப்பார்”


  • kamadenu
  • Posted: 13 Apr, 2019 17:34 pm
  • அ+ அ-

-இந்து குணசேகர்

”எனது தங்கை எந்த தவறும் செய்யவில்லை. அவள் அப்பாவி. சூழ்நிலை என்னவாக இருந்தாலும்  இதற்கான பதிலடியை அல்லா கொடுப்பார்” ஏமனின்  தலைநகர் சனாவில் பள்ளி ஒன்றில் சவுதி கூட்டுப் படைகள் நடத்திய வான்வழித் தாக்குதலில் கொல்லப்பட்ட சிறுமியின் சகோதரி கூறிய வார்த்தைகள் இவை.

தென் மேற்கு ஆசிய  நாடான ஏமனில் கிட்டதட்ட 4 ஆண்டுகளுக்கு மேலாக ஷியா-சன்னி பிரிவுகளுக்கு இடையே  உள்நாட்டுப் போர் நடந்து வருகிறது. இதில் சன்னி பிரிவைச் சேர்ந்த அதிபர் மன்சூர் ஹைதிக்கு ஆதரவாக சவுதி அரேபியா (சன்னி முஸ்லிம்கள் பெரும்பான்மையாக வசிக்கும் நாடு)  ஆதரவாக செயல்படுகிறது. ஹவுத்தி (ஷியா பிரிவினர்) கிளர்ச்சிப் படைக்கு ஈரான் ஆதரவு அளிக்கிறது.

இதுவரை உள்நாட்டுப் போர் காரணமாக 40,000 பேர் கொல்லப்பட்டிருக்கிறார்கள் என்று கூறப்படுகிறது. அதில் 5,000க்கும் மேற்பட்டவர்கள் குழந்தைகள். 80 லட்சத்துக்கு அதிகமான மக்கள் வறுமையின் கொடிய பசியில்  சிக்கி தவித்து வருகிறார்கள். இவர்களில் 50 லட்சம் குழந்தைகள்.  20 லட்சத்துக்கு அதிகமான மக்கள் அகதிகளாக மாறியுள்ளனர்.

 

ngb.jpg 

கடந்த 2018 -ம் ஆண்டில் ஏமனில் நடக்கும் உள் நாட்டுப் போர் காரணமாக 4,800 பொது மக்கள் இறந்திருக்கிறார்கள் என்றும்.  அதில் ஒவ்வொரு வாரமும் பொதுமக்களில் 100 பேர் உயிரிழந்திருக்கின்றன அல்லது காயமடைந்திருக்கின்றனர் என்று ஐக்கிய நாடுகளின் சபை தெரிவித்திருந்தது.

இதன் காரணமாக உலகிலேயே ஏமன் மனிதாபிமான நெருக்கடி அதிகமுள்ள நாடாக இருக்கிறது.

 

n.jpg 

 

தினம் தினம் வான்வழித் தாக்குதலை நடந்தும் சவுதி - கூட்டுப் படைகளை ஐக்கிய நாடுகள் சபை கண்டித்தும் அவை தொடர்ந்து வருகின்றன. அமெரிக்கா, பிரிட்டன், பிரான்ஸ் ஆகியவை ஏமன் அரசு படைக்கு ஆயுதங்களை வழங்கி வருகிறது. இதில் தொடர் கண்டனங்கள் எழுந்ததைத் தொடர்ந்து பிரான்ஸ் சமீபத்தில் ஏமனுக்கு ஆயுதங்கள் வழங்குவதை நிறுத்துவதாக தெரிவித்தது.

பள்ளிக் கூடங்கள், மருத்துவமனைகள், மசூதிகள், சந்தைகள் என எந்த பரிவும் இல்லாமல் சவுதி கூட்டுப் படைகள் ஹவுத்தி கிளர்ச்சியாளர்களுக்கு எதிராக வான்வழி தாக்குதலை நடத்தி வருகிறது.

இதில் கடந்த 9 ஆம் தேதி  ஏமன் தலை நகர் சனாவில் கிளர்ச்சியாளர்கள் கட்டுப்பட்டின் கீழ் உள்ள பகுதிகளில் சவுதி கூட்டுப் படைகள் வான்வழித் தாக்குதல் நடத்தியது. இதில்40க்கும் மேற்பட்ட குழந்தைகள் கொல்லப்பட்டனர்.  பல குழந்தைகள் உயிருக்கு ஆபத்தான நிலையில் மருத்துவமனையில் இன்றும் சிகிச்சை பெற்று வருகின்றனர்.

இறந்த குழந்தைகளின் உடல்களை அப்பளியில் பயின்ற குழந்தைகள் சுமந்து சென்ற புகைப்படங்கள் கடந்த இரண்டு நாட்களாக சமூக வலைதளங்களில் உலா வருகின்றன. ஆனால் இது குறித்து சவுதி தரப்பில் இதுவரை எந்த பதிலும் அளிக்கப்படவில்லை. வழக்கம்போல் நாங்கள் கிளர்ச்சியாளர்களைக் குறிவைத்துதான் தாக்குதல் நடத்தினோம் என்று சவுதி கூறவே வாய்ப்புகள் அதிகம். ஏனெனில் கடந்த கால வரலாறுகளும் அவ்வாறுதான் உள்ளன.

அதுமட்டுமில்லாது பாதிக்கப்பட்ட மக்களுக்கு ஐக்கிய நாடுகள் சபை சார்பில் அனுப்பி வைக்கப்படும் உணவு மருத்துகள் செல்லும் கடல் வழி பாதையையும் சவுதி தடுத்து வைத்துள்ளது.

 

 

போட்டோ கேலரி

Hindu Tamil Thisai - Kindle Edition


[X] Close