[X] Close

அரசு மருத்துவமனைகளை மேம்படுத்தக் கோரி மருத்துவர் சங்கம் ஆர்ப்பாட்டத்தில் முன்வைத்த 12 கோரிக்கைகள்


12

  • kamadenu
  • Posted: 15 May, 2019 20:05 pm
  • அ+ அ-

அரசு மருத்துவமனைகளை மேம்படுத்தக் கோரி மருத்துவர் சங்கம் 12 கோரிக்கைகளை ஆர்ப்பாட்டத்தில் முன்வைத்தது.

சமூக சமத்துவத்திற்கான டாக்டர்கள் சங்கம், தமிழ்நாடு மருத்துவப் பணியாளர்கள் கூட்டமைப்பு, அனைத்திந்திய மாணவர் பெருமன்றம், அனைத்திந்திய இளைஞர் பெருமன்றம், பேரா மெடிக்கல் கல்வி மற்றும் நலச் சங்கம்  மற்றும் ஒடுக்கப்பட்டோர் வாழ்வுரிமை இயக்கம் ஆகியவற்றின் சார்பில் சென்னை சேப்பாக்கம் விருத்தினர் மாளிகை அருகில் இன்று ஆர்ப்பாட்டம் நடைபெற்றது.

இந்திய கம்யூனிஸ்ட் கட்சியின் மாநிலச் செயலாளர் முத்தரசன் இந்த ஆர்ப்பாட்டத்தை தொடங்கி வைத்தார். சமூக சமத்துவத்திற்கான டாக்டர்கள் சங்கத்தின் பொதுச் செயலாளர் டாக்டர் ஜி.ஆர். ரவீந்திரநாத் தலைமை தாங்கினார்.

ஆர்ப்பாட்டத்தில் முன்வைக்கப்பட்ட கோரிக்கைகள்

* மின் வெட்டால் வென்டிலேட்டர் செயலிழந்து, மதுரை ராஜாஜி மருத்துவமனையில் இறந்த நோயாளிகளின் குடும்பத்தினர், கெட்டுப் போன இரத்தம் செலுத்தியதால் ஓசுர், தருமபுரி, கிருஷ்ணகிரி அரசு மருத்துவமனைகளில் இறந்த கர்ப்பிணி பெண்களின் குடும்பத்தினர் மற்றும் எச்.ஐ.வி கிருமி உள்ள ரத்தத்தை சாத்தூர் அரசு மருத்துவமனையில் செலுத்தியதால் பாதிக்கப்பட்ட பெண் உள்ளிட்டோருக்கு இழப்பீடு வழங்கிட வேண்டும்.  மேற்கண்ட நிகழ்வுகள் குறித்து நேர்மையான விசாரணைக்கு உத்தரவிட வேண்டும்.

* அரசு மருத்துவமனைகள், ரத்த வங்கிகள், ரத்தப் பரிசோதனை நிலையங்களின் சேவைத் தரத்தை மேம்படுத்திட நடவடிக்கைகளை எடுத்திட வேண்டும். கட்டமைப்பு வசதிகளை மேம்படுத்த வேண்டும். நவீன தொழில்நுட்ப வசதிகளை ஏற்படுத்திட வேண்டும்.

* தமிழ்நாடு முழுவதும் நடைமுறைப்படுத்தப்படும் அறிவிக்கப்படாத திடீர் மின் வெட்டுகளால், அரசு மருத்துவமனைகள் மிகவும் பாதிக்கப்படுகின்றன.இதனால் நோயாளிகள் கடும் பாதிப்புக்குள்ளாகிறார்கள். அறுவை சிகிச்சைகள் பாதிக்கப்படுகின்றன. காலதாமதமாகின்றன. நோயாளிகளின் உயிருக்கும் ஆபத்து ஏற்படுகிறது .எனவே, அறிவிக்கப்படாத மின் வெட்டை நடைமுறைப்படுத்துவதைக் கைவிட வேண்டும்.

* அனைத்து அரசு மருத்துவமனைகளுக்கும்  தடையின்றி மின்சாரம் கிடைக்கும் வகையில் தனி மின் இணைப்புகளை வழங்கிட வேண்டும். ஜெனரேட்டர்கள் யு.பி.எஸ் கருவிகளை வழங்க வேண்டும்.

* தீவிர சிகிச்சைப் பிரிவு, அறுவை அரங்குகள், பிரசவ வார்டு போன்றவற்றிற்கு கூடுதலாக தனி ஜெனரேட்டர்கள் வழங்குவதுடன், இன்வெர்ட்டர் வசதிகளையும் ஏற்படுத்த வேண்டும்.

* அரசு மருத்துவமனைகளில் சூரிய மின்சக்தி வசதியை ஏற்படுத்திட வேண்டும்.

* அரசு மருத்துவமனைகளில் நோய்க்கிருமி கொல்லி மருந்துகள், வலி நிவாரணி மருந்துகள் கை உறைகள், ஊசி போடுவதற்கான சிரிஞ்சிகள் போன்றவை இல்லாததால் நோயாளிகள் கடுமையாகப் பாதிக்கப்பட்டுள்ளனர். எனவே  இவற்றின் தட்டுப்பாட்டைப் போக்க நடவடிக்கை எடுத்திட வேண்டும்.

* அத்தியாவசியமான உயிர் காக்கும் மருந்துகள், தடுப்பூசிகள், உபகரணங்கள் போன்றவற்றை மத்திய - மாநில அரசுகளே பொதுத் துறை நிறுவனங்கள் மூலம் உற்பத்தி செய்திட வேண்டும். இதன் மூலம் மட்டுமே மருந்துகள் தடையின்றி  கிடைப்பதை உத்தரவாதப்படுத்த முடியும். தரமான மருந்துகள் அரசு மருத்துவமனைகளுக்கு கிடைப்பதை உறுதி செய்ய முடியும். மருந்துகளை வாங்கும் செலவும் அரசுக்குப் பன்மடங்கு குறையும்.

* அரசு மருத்துவமனைகளில் உள்ள கருவிகள், மருத்துவ உபகரணங்களைச் சிறப்பாக பராமரிக்க கூடுதல் கவனம் செலுத்திட வேண்டும்.

*  ஊழல் முறைகேடுகள் நிர்வாகச் சீர்கேடுகளை போக்கிட நடவடிக்கை எடுத்திட வேண்டும்.

* அனைத்து காலிப் பணியிடங்களையும் நிரந்தர ஊழியர்கள் மூலம் நிரப்பிட வேண்டும். நோயாளிகளின் எண்ணிக்கைக்கு ஏற்ப புதிய பணியிடங்களை உருவாக்கிட வேண்டும்.

* அரசு மருத்துவமனைகளில் ஏற்பட்டுள்ள கடும் தண்ணீர் தட்டுப்பாட்டால் ,நோயாளிகளும், மருத்துவமனை ஊழியர்களும் கடும் பாதிப்புக்கு உள்ளாகியுள்ளனர். தண்ணீர் தட்டுப்பாட்டை நிரந்தரமாகப்  போக்கிட உடனடி நடவடிக்கை எடுத்திட வேண்டும்.

 

வாக்களிக்கலாம் வாங்க

'லிசா உங்கள் ஸ்டார் ரேட்டிங் என்ன?

போட்டோ கேலரி

Hindu Tamil Thisai - Kindle Edition


[X] Close