[X] Close

எவர் உயிருக்கும் பாதுகாப்பற்ற நிலை தொடர்கிறது: முத்தரசன் வேதனை


  • kamadenu
  • Posted: 14 May, 2019 14:10 pm
  • அ+ அ-

எவர் உயிருக்கும் பாதுகாப்பற்ற நிலை தொடர்கிறது என, இந்திய கம்யூனிஸ்ட் கட்சியின் மாநிலச் செயலாளர் இரா.முத்தரசன் வேதனை தெரிவித்துள்ளார்.

இதுதொடர்பாக, இரா.முத்தரசன் இன்று (செவ்வாய்க்கிழமை) வெளியிட்ட அறிக்கையில், "தமிழ்நாட்டில் சட்டம் - ஒழுங்கு பெரும் கேள்விக்குறியாகி வருவது மிகுந்த கவலை அளிக்கின்றது. குறிப்பாக, பெண்களுக்குப் பாதுகாப்பற்ற நிலை தொடர்ந்து நீடித்து வருவது கடும் கண்டனத்திற்குரியதாகும்.              

பட்டப்பகலில், மக்கள் நடமாட்டம் மிகுந்த பொது வெளியில் கூட பெண்கள் தனியாகச் செல்ல முடியாத அளவுக்கு, அவர்கள் அணிந்துள்ள நகைகளை அபகரிக்கும் சமூக விரோதிகளின் எண்ணிக்கை நாளுக்கு நாள் அதிகரித்து வருகின்றன.               

பாலியல் வன்கொடுமையின் உச்சத்தில் பொள்ளாச்சி சம்பவம் தமிழகத்தையே தலைக்குனிய வைத்துள்ளது.               

ஆண்டுக்கணக்கில் இத்தகைய சமூக விரோதச் செயல்களைச் செய்திட இயலும் என்றால் பெரிய இடத்துப் பிள்ளைகள் எதை வேண்டுமானாலும் செய்யலாம் கேட்பார் யாரும் இல்லை என்று நிலை உருவாகி உள்ளது.  

அதன் விளைவுகள் எத்தகைய சீரழிவை ஏற்படுத்தும் என்பதனை இன்றைய பொறுப்பில் உள்ளோர் உணர்ந்து, சமூக விரோதக் கும்பலைக் காப்பாற்றும் நிலையைக் கைவிட்டு, யாராக இருப்பினும் உரிய நடவடிக்கைகள் மேற்கொண்டு குற்றவாளிகளை உடனடியாக சட்டரீதியாக தண்டிக்க வேண்டும்.               

கடலூர் மாவட்டம் கருவேப்பிலங்குறிச்சியில் கல்லூரி மாணவி கொடூரமான முறையில் கொலை செய்யப்பட்டுள்ளார். இதனைப் போன்ற கொடூர சம்பவங்கள் தொடர்ந்து நடைபெற்று வருகின்றன.               

இச்சம்பவங்களில் தொடர்புடையோர் யார் என்பது குறித்து உரிய விசாரணை மேற்கொண்டு உண்மையான குற்றவாளிகள் கண்டறியப்பட்டு, தண்டிக்கப்படுவதுடன், பாதிக்கப்பட்ட குடும்பத்தினருக்கு தமிழக அரசு உரிய நிவாரணம் வழங்க வேண்டும்.               

குழந்தைகள் கடத்தப்பட்டு விற்பனை செய்யப்படுவது. பெண்களுக்கு வேலை வாங்கி தருவதாகக் கூறி ஏமாற்றி சீரழிப்பது போன்ற சம்பவங்கள் ஒன்றின் பின் ஒன்றாக தொடர்வது, மிகுந்த கவலைக்கும், வேதனைக்கும் உரிய ஒன்று என்பது மட்டுமல்ல, தமிழ்நாட்டில் சட்டம் ஒழுங்கு என்று ஒன்று உள்ளதா? எனக் கேள்வி எழுகின்றது.               

தூத்துக்குடி துப்பாக்கிச் சூட்டை, தடியடியை குறும்படம் தயாரித்து வெளியிட்ட சமூக ஆர்வலர் முகிலன் கதி என்ன ஆனது என்ற வினாவுக்கு பல மாதங்கள் ஆன நிலையிலும் பதில் இல்லை என்பது மூலம் தமிழ்நாட்டில் சட்டம் ஒழுங்கு சீர்குலைந்துள்ளது என்பது உறுதிப்படுத்தப்படுகின்றது.               

சட்டம் ஒழுங்கை நிலைநாட்டி, ஒவ்வொருவரின் உயிருக்கும், உடமைக்கும் பாதுகாப்பு அளிக்க அரசு உரிய நடவடிக்கை எடுத்திட வேண்டும்" என முத்தரசன் வலியுறுத்தியுள்ளார்.

வாக்களிக்கலாம் வாங்க

'லிசா உங்கள் ஸ்டார் ரேட்டிங் என்ன?

போட்டோ கேலரி

Hindu Tamil Thisai - Kindle Edition


[X] Close