[X] Close

அன்னாபிஷேக மகிமை!


annabhishega-magimai

  • kamadenu
  • Posted: 24 Oct, 2018 09:26 am
  • அ+ அ-

வி.ராம்ஜி

உமையொருபாகனான சிவபெருமான், அபிஷேகப் பிரியர். அதனால் அவருக்குப் அள்ளக் குறையாத, காணக் கண்கோடி போதாதபடி பலவகையான அபிஷேகங்கள் நடந்துகொண்டிருக்கும்.

பசும்பால், இளநீர், கருப்பஞ்சாறு, சந்தனம், விபூதி, தயிர், பஞ்சாமிர்தம், மாப்பொடி, மஞ்சள், பஞ்சாமிர்தம், திரவியப்பொடி, தேன் என அனுதினமும் அபிஷேகம் செய்வார்கள். அவை அனைத்தையும் விட சிறந்தது... அன்னம். அன்னாபிஷேகம்!

அன்னம் பிராணன் என்றும், அஹமன்னம் எனவும் வேதங்கள் போற்றுகின்றன. ஒருவன் எத்தகைய உணவு உண்கிறானோ அதைப் பொறுத்தே அவனது மனம் இருக்கும் என்கின்றன நமது உபநிடதங்கள். உணவு எப்படியோ அதுவே உள்ளத்தின் குணாதிசயம் என்பார்கள்.
இத்தகைய சிறப்பு வாய்ந்த அன்னத்தை கொஞ்சம் கூட வீணாக்கக் கூடாது என்பதை உணர்த்தவும், அன்னத்தின் தெய்வீகத் தன்மையை எடுத்துக் காட்டவும் முக்கியமாக எல்லோரும் பகிர்ந்து உண்ணவேண்டும் என்பதை உணர்த்தும் விதமாகவும் அன்னாபிஷேகம் எனும் வைபவம் நடைபெறுகிறது.

அது மட்டுமல்ல, நமது பேரண்டம் நிலம், நீர், ஆகாயம், காற்று, நெருப்பு என்னும் பஞ்ச பூதங்களால் ஆனது. அண்டத்தில் உள்ளது பிண்டத்திலும் என அருளியிருக்கிறார் திருமூலர். அவரின்  வாக்குப்படி நமது உடலுக்கும் பஞ்சபூதங்களுக்கும் தலைவன் சிவபிரான்.
அந்தப் பஞ்சபூதங்களை சரியான வகையில் செயல்படச் செய்து, உயிர்களுக்கு உணவும் நீரும் குறைவின்றிகிட்ட அருள் செய்த ஈசனுக்கு நன்றி சொல்லும் வகையில், நாட்டிலும் வீட்டிலும் உணவுப் பஞ்சம் வராமல் இருக்கவும் இறைவனுக்கு அன்னாபிஷேகம் செய்யும் பழக்கத்தை ஏற்படுத்தினர்.

அன்னம் என்பது பஞ்ச பூதங்களின் சேர்க்கையால் உண்டாவது நிலத்தில் விழும் நெல், ஆகாயத்திலிருந்து பெய்யும் மழை நீரின் உதவியால் வளர்ந்து, காற்றினால் கதிர்பிடித்து, சூரியனின் வெப்பத்தீயினால் பால் இறுகி விளைச்சலைத் தருகிறது. காற்றின் உதவியுடன் கதிரடித்து எடுக்கப்படும் நெல், உமி நீக்கப்பட்டு அரிசியான பின் மண்ணால் ஆன பானையில் நீரில் இடப்பட்டு, காற்றின் துணையால் எரியும் நெருப்பில் வெந்து, அன்னமாகி ஆகாயத்தின் கீழுள்ள அனைத்து உயிர்களுக்கும் உணவாகிறது. அந்த அன்னத்தினால் செய்யப்படுவதால்தான், அன்னாபிஷேகம் எனப் போற்றிப் புகழ்ந்திருக்கிறார்கள்.

இன்று 24.10.18 அன்னாபிஷேகம். அற்புதமான அன்னாபிஷேக நன்னாளில், தென்னாடுடைய சிவனை தரிசிப்போம். வணங்குவோம். அன்னாபிஷேகப் பிரசாதத்தைப் பெற்று, இனிதே வாழ்வோம்!

போட்டோ கேலரி

Therkil Irunthu Oru Suriyan - Kindle Edition


[X] Close