[X] Close

பாக்யத லக்ஷ்மி பாரம்மா... லக்ஷ்மி ராவேமா இண்டிகி! - இன்று வரலக்ஷ்மி விரதம்


varalakshmi-festival

  • வி.ராம்ஜி
  • Posted: 24 Aug, 2018 05:53 am
  • அ+ அ-

  
 திருமணமான பெண்கள் கொண்டாடுகிற பண்டிகை இது. புகுந்த வீட்டில் இந்த பூஜை கொண்டாடுகிற வழக்கம் உள்ளவர்கள், தவறாமல் கடைப்பிடிப்பார்கள். வழக்கம் இல்லையே என்பவர்கள் கூட, இந்தப் பூஜையின் பலன்களாலும் பூஜை செய்வதால் கிடைக்கும் மனநிம்மதியாலும் சகல ஐஸ்வரியங்களும் வீடு வந்து நிறைவதாலும் கொண்டாடுபவர்களும் உண்டு! வரங்களையும் வளங்களையும் தந்து மகிழ்விக்கும் அற்புதமான விரதம்... வரலக்ஷ்மி பூஜை. 
 சின்னச்சின்னதான மாறுபாடுகள் இருந்தாலும், ஏறக்குறைய  எல்லோருமே அம்மனைக் கலசத்தில் இருத்தி  அலங்காரங்கள் செய்து, வீட்டுக்குள் அழைத்து,  பூஜை செய்வது வழக்கம். தமிழகத்தில், திருமணமான பெண்கள் மட்டும் செய்வார்கள். கர்நாடகாவில் தம்பதியாக அமர்ந்து பூஜை செய்வார்கள்.  வடை, பாயசம், இட்லி. கொழுக்கட்டை,  நைவேத்தியங்கள், பட்சணங்கள், சுண்டல், பழங்கள் என தங்களால் முடிந்ததைக் கொண்டு, இந்த பூஜையைச் செய்யலாம்!
 வருடந்தோறும் தொடர்ந்து செய்துவிட்டு, ஏதேனும் காரணத்தால் விரதம் இருக்க முடியாதவர்கள் கூட, அருகில் பூஜை செய்பவர்கள் வீட்டுக்குச் சென்று, பூஜையில் கலந்து கொள்ளலாம்.
 புதிதாகக் கல்யாணமாகி வந்து, பூஜையில் கலந்து கொள்பவர்களுக்கு, முதல் பூஜையை தலை நோன்பு என்பார்கள். பிறந்த வீட்டில் எல்லா சீர் வகைகளும் செய்து அனுப்புவார்கள். அம்மனின் முகம், கலசம், பூஜைக்கு வேண்டிய உபகரணங்கள்,   பழங்கள் என சிறப்பாக செய்து அனுப்புவார்கள்.
  பூஜை செய்யும் இடத்தை,  சுத்தம் செய்து அம்மன் அமரக்கூடிய இடத்தை தயார் செய்யவேண்டும். அந்தக் காலத்தில்,  மண் தரை என்பதால், பசுஞ் சாணத்தைக் கொண்டு தரை மெழுகி சுத்தம் பண்ணுவார்கள். சுவரில் சுண்ணாம்பு அடித்து  மண்டபத்தில்,  கலசத்தில், வரலக்ஷ்மி வீற்றிருப்பதைப் போல் வண்ணக் கலவைகளால் ஓவியம் வரைவார்கள். இப்போது அநேகமாக படமாகவே மாட்டி விடுகின்றனர்.
அந்தக்காலத்தில்,  வரலக்ஷ்மி முகங்கள் என்று வெள்ளியில் செய்தது எதுவும் கிடையாது. கண், மூக்கு, வாய், காது என்று வெள்ளியில் செய்த அவயவங்கள் மட்டுமே கிடைக்கும்.
 வெள்ளி, பித்தளை, வெண்கலம் அல்லது செப்புச்  செம்புகளிலோ, சிறிய குடங்களிலோ கலசம் வைப்பார்கள். அதில், சந்தனத்தை இடுவார்கள். அந்த சந்தனத்தில் உருவங்களைப் பொருத்துவார்கள். கலசத்தில், அரிசியை நிரப்பி, வெற்றிலைப்பாக்கு, மஞ்சள், வெள்ளிக்காசுகள், தங்க நகை என அதில் போட்டு,  அதன்மேல் ஒரு சுத்தமான மாவிலைக்கொத்தைச் சொருகி, குடுமியுடன் கூடிய நல்ல தேங்காயை,  மஞ்சள் பூசி பொருத்துவார்கள்.


  எலுமிச்சை பழம், விச்சோலை, கருகமணி   அவசியம் வைப்பார்கள். இப்போது வெள்ளியில் செய்த  வரலக்ஷ்மி முகம்   அழகான நகைகளுடன் கிடைக்கின்றன. அதை வாங்கிக் கலசத்தின் மேல் பொருத்தி விடுவது வழக்கம். விதவிதமான  பாவாடை, புடவைகளையும் அணிவித்து அழகாக அலங்காரங்கள் செய்யலாம். இதுபோல், அலங்கரித்து ,அம்மனை தனியான இடத்தில் அமர்த்துவார்கள். பூஜை செய்யப்போகும் இடத்தில் அழகான மாக்கோலமிட்டு, செம்மண் பூசி   அழகாக பந்தல் அமைக்கிறோம். ஒரு மேஜையைக் கொண்டு, பந்தல் அமைத்து, வாழைக் கன்றுகளைக் கட்டி, மாவிலைத் தோரணங்கள் அமைத்து  அலங்கரிப்பார்கள்.
  தாமரை, மல்லிகை, மருக்கொழுந்து, ரோஜா, ஸம்பங்கி என  வாஸனை புஷ்பங்கள், மாலைகள் அணிவிக்கலாம். குத்து விளக்குகளை இரண்டு பக்கமும் வைத்து ஏற்றுவார்கள்.
  தன, தான்ய லக்ஷ்மியுடன், வரலக்ஷ்மி சேர்த்து ஒன்பது லக்ஷ்மிகள். நோன்பின் முக்கிய அம்சமாக  நோன்புக்கயிறு வைத்து, அதையும் பூஜை செய்து,  மஞ்சள்சரடை வலதுகையில் பெரியவர்களைக் கொண்டு அணிந்து கொள்வார்கள்!
  வெள்ளிக்கிழமை  காலை. விடியற்காலை. பரபரவென்று இயங்குகிறோம். வாசலில் கோலம்போடுவதில் ஆரம்பித்து, குளித்து, மடியாக நிவேதனங்களைத் தயாரித்து, மண்டபத்தில் கோலம்போட்டு செம்மண் கோலமும் இட்டு, பூஜைக்கு தேவையானவற்றைக் கொண்டு, அம்மனை எடுத்து வருவார்கள். இதை அம்மனை அழைத்தல் என்பார்கள்!
  கற்பூர ஆரத்தி எடுத்து, நமஸ்கரித்து, பக்தி சிரத்தையாக உடன் ஒரு சுமங்கலி அல்லது,  கன்னிகை உதவியுடன், ஸௌபாக்கியத்தைக் கொடுக்கும்  லக்ஷ்மி தேவியே  நீங்கள் வர வேண்டுமம்மா என்று சிரத்தையுடன் பாடல்களைப் பாடி அதி கவனமாக கலசத்தை உள்ளே எடுத்துவந்து    தயாராக அலங்கரித்து, தீபங்களுடன் கூடிய மண்டபத்தில்,.கிழக்கு முகமாக  வைத்து பூஜிக்கவேண்டும்.
  பாக்யத லக்ஷ்மி பாரம்மா. லக்ஷ்மி, ராவேமா இண்டிகி. எனப் பாடுவார்கள்.
  அம்மனுக்கு எல்லாவித உபசாரங்களையும் செய்து  ஆஸனத்தில் இருத்தி ஆடை, ஆபரணங்கள், ரவிக்கைத் துணி, பஞ்சு வஸ்திர மாலைகள், அணிவித்து, அஷ்டோத்திர சத நாமாவளிகளால்  பூக்களினால் அர்ச்சனை செய்யலாம். தூப ,தீபங்களைக் காட்டி, நிவேதனம் செய்யவேண்டும். நோன்புச் சரடுகளில் ஒவ்வொரு  புஷ்பங்களைத் தொடுத்து வைத்திருப்பதை அம்மனின் பாதங்களில் வைத்து அதற்கும் தனிப்பட பூஜை செய்யவேண்டும்.
  பூஜை முடிந்து ஒவ்வொரு சரடாக எடுத்துப் பெரியவர்களால்   சுமங்கலிகளுக்கும், கன்யாப் பெண்களுக்கும்,  வலது கையில் கட்டப் படும். அப்படிக் கட்டும்போது   கையில் வெற்றிலைப் பாக்கு, மஞ்சள், பூ, தேங்காய், பழங்களைக் கொடுத்துக்,   குங்குமமிட்டு சரடைக் கட்டுவார்கள். பெரியவர்களை நமஸ்கரித்து ஆசிர்வாதம் பெறுவார்கள்.
வரலக்ஷ்மி எனும் மகாசக்திக்கு பூஜை செய்யுங்கள். தடைப்பட்ட மங்கல காரியங்களையெல்லாம் தந்து, சக்தியுடனும் சந்தோஷத்துடனும் வாழச் செய்வாள் லக்ஷ்மிதேவி! 
 

போட்டோ கேலரி

Therkil Irunthu Oru Suriyan - Kindle Edition


[X] Close