[X] Close

ராகு தோஷம் நீக்கும் திருவிடைக்கழி முருகன்!


thaipoosam-spl

திருவிடைக்கழி முருகன்

  • வி.ராம்ஜி
  • Posted: 21 Jan, 2019 09:39 am
  • அ+ அ-

வி.ராம்ஜி

தைப்பூசம் ஸ்பெஷல்

  திருவிடைக்கழி முருகனை ஒருமுறையேனும் தரிசியுங்கள். தைப்பூச நன்னாளில், மனதார நினைத்து, வீட்டில் சர்க்கரைப் பொங்கல் நைவேத்தியம் செய்து பிரார்த்தனை செய்யுங்கள். ராகு தோஷத்தை நீக்கி அருள்வான் திருவிடைக்கழி முருகன். 

சூரபத்மன் முதலான மூன்று அசுரர்களை முருகக் கடவுள் அழித்த திருத்தலங்கள் மூன்று இடங்களாக  அமைந்துள்ளது. தாரகாசுரன் என்பவனை அழித்த இடம் மதுரை அருகே உள்ள திருப்பரங்குன்றம் என்கிறது புராணம்.

   மற்றொரு அசுரனான சிங்கமுகனை, கந்தக் கடவுள் வதம் செய்த தலம் போரூர் என்றும் சூரபத்மனனை அழித்த இடம் திருச்செந்தூர் என்றும் போற்றுகின்றனர்.

  இந்த சூரசம்ஹாரத்தின் போது, அன்னை உமையவளிடம் வேல் வாங்கி போர் செய்தார் முருகன் என்கிறது புராணம். ஆனால், அன்னையிடம் வேல் வாங்கினாலும் தந்தையின் அருளைப் பெற்று, தந்தையுடனேயே சந்நிதி கொண்டிருக்கும் திருத்தலம் விசேஷமாகப் போற்றப்படுகிறது.

 நாகை மாவட்டம் திருக்கடையூருக்கு அருகில் உள்ளது திருவிடைக்கழி. இங்கே நின்ற திருக்கோலத்தில், கம்பீரமாக சிரித்தபடி அருள்பாலிக்கிறார் முருகப்பெருமான். எந்தத் தலத்திலும் இல்லாத வகையில், இங்கே கருவறையில் முருகப்பெருமான் நின்றிருக்க, அருகில் சிவலிங்கத் திருமேனியும் காட்சி தருவது விசேஷம் என்று சொல்லிப் பூரிக்கின்றனர். 

  அசுரக் கூட்டங்களை கொன்ற தோஷம் நீங்குவதற்காக, இந்தத் தலத்தில் உள்ள குரா எனும் மரத்தடியில் அமர்ந்து, சிவபெருமானை நோக்கி கடும் தவமிருந்தார் முருகப்பெருமான்.  அதில் மகிழ்ந்த சிவனார், முருகக் கடவுளின் பாவங்களைப் போக்கி அருளியதாகச் சொல்கிறது தல புராணம்!

   இங்கு, ராகு பகவான் கந்தபிரானை வணங்கி, அருள் பெற்றார். எனவே ராகு தோஷம் உள்ளவர்கள் இந்தத் தலத்துக்கு வந்து, ஸ்ரீசுப்ரமண்யரை கண்ணாரத் தரிசித்து, மனதாரப் பிரார்த்தனை செய்தால், தோஷ நிவர்த்தி பெறலாம் என்கின்றனர் பக்தர்கள்!

  தைப்பூச நன்னாளில்... இங்கு பல்லாயிரக்கணக்கான பக்தர்கள் வந்து சுவாமி தரிசனம் செய்வார்கள். அபிஷேகம் செய்து வேண்டிக் கொள்வார்கள்.

திருவிடைக்கழி கந்தவேலனை தரிசியுங்கள். நல்ல நல்ல திருப்பமெல்லாம் வாழ்வில் நடந்தேறும் என்பது உறுதி! 

போட்டோ கேலரி

Hindu Tamil Thisai - Kindle Edition


[X] Close