[X] Close

காலமெல்லாம் கண்ணதாசன் - 30 : நான் நிரந்தரமானவன் அழிவதில்லை!


kalamellam-kannadasan-30

  • ஆர்.சி.மதிராஜ்
  • Posted: 21 Sep, 2018 09:07 am
  • அ+ அ-

பாடல்கள் இல்லாத உலகை நம்மால் கற்பனைகூட செய்து  பார்க்க முடியாது. வாழ்க்கையில் நாம் படும் பாடுதான் `பாடல்கள்'. நம்முடைய நாட்டுப்புறப் பாடல்களில்தான் நம்முடைய உழைப்பு, நம்முடைய கண்ணீர், நம்முடைய வியர்வை, நம்முடைய உறக்கம், நம்முடைய வாழ்க்கை என்று அத்தனையும் அடங்கியிருக்கிறது. நம்முடைய சுக துக்கங்களில் பெரும்பங்கு வகிப்பவை இசையும் பாடல்களும். அப்படி நம்மோடு இரண்டறக் கலந்த பல பாடல்களை எழுதிய பாடலாசிரியர்களுள் முதன்மையானவர் கவியரசர் கண்ணதாசன்.

கண்ணதாசன் பாடலாசிரியர் மட்டும் இல்லை. சிறந்த கதாசிரியர், வசனகர்த்தா, பத்திரிகையாளர், பாடலாசிரியர், இலக்கியவாதி என்று பன்முகத் திறன் கொண்டவர். அவர் எழுதிய `அர்த்தமுள்ள இந்துமதம்' அழியாப்புகழ் பெற்றது.

தன்னுடைய பாடல்களை ஒரு எல்லைக்குள் சுருக்கிவிடாமல் அதன்மூலம் என்னவெல்லாம் செய்யலாம் என்று அத்தனை சோதனை முயற்சிகளையும் மேற்கொண்டவர். வரலாறு, நாட்டுப்பற்று, இதிகாசம், புராணம், நாட்டுப்புறப் பாடல்கள், மனிதநேயம், காதல், தத்துவம், வாழ்க்கை, மனித உறவுகள் என்று எல்லாவற்றிலும் தேர்ந்த ஞானமும் அனுபவமும் கொண்டவர். தன்னுடைய அனுபவத்தையும், திறமையையும் திரைப்பாடல்களின் வரிகளுக்குள் சேர்த்து பின்னிக்கொண்டவர். தமிழ் இலக்கணத்தின் மரபு, சந்தம், எதுகை, மோனை, இரட்டைக்கிளவி, அடுக்குத் தொடர், அந்தாதி என்று எல்லாவற்றையும் தன்னுடைய பாடல்களில் பயன்படுத்தியவர்.

கவியரசரின் ஒவ்வொரு பாடலும் எளிய மக்களின் உணர்வுகளைத் தொட்டு அவர்களோடு சக தோழனாய் உறவாடின. அழும்போதும் கண்ணதாசனின் பாடல்களைக்கேட்டபடி அழவேண்டும். அது ஒரு சுகம். அதனால்தான் காலம் கடந்தும் இன்னும் அவரது பாடல்கள் நம்மைத் தாலாட்டிக்கொண்டிருக்கின்றன.
* * *


`அத்திக்காய் காய் காய்' பாடலில் தொடர்ந்து காய், காய் என்று வார்த்தைகளால் விளையாடியவர், `வான் நிலா நிலா அல்ல...' என்று பாடல் முழுக்க நிலவொளியை சிதறவிட்டிருப்பார்.

அண்ணன், தங்கை, தம்பி, பெற்றோர், மனைவி என்று எல்லா உறவுகளின் தேவையையும், அதன் சிக்கல்களையும் பாடல்களில் கையாண்டவர் அவரளவுக்கு எவருமில்லை என்றே சொல்லலாம். அண்ணன் தம்பிக்குள் ஏற்பட்ட உறவு முறிவை `அண்ணன் என்னடா தம்பி என்னடா அவசரமான உலகத்திலே... தாயும் பிள்ளையும் ஆன போதிலும் வாயும் வயிறும் வேறடா...' என்று ஆழமாகவும்,`மனித ஜாதியில் துயரம் யாவுமே மனதினால் வந்த நோயடா...' என்று மனித வாழ்வின் தத்துவத்தை இரண்டு இரண்டு வரிகளுக்குள் அவரைப்போல் பதியனிட்டவர் எவருமில்லை.
* * *

`உன் கண்ணில் நீர் வழிந்தால் என் நெஞ்சில் உதிரம் கொட்டுதடி' என்ற மகாகவி பாரதியின் இரண்டு வரிகளைப் பல்லவியில் பயன்படுத்திக்கொண்டு, அதனைத் தொடர்ந்து கவியரசர் செய்தது மிகப்பெரிய ரசவாத வித்தை. எல்லா உறவுகளையும் தாண்டி கணவன் மனைவிக்குள் உள்ள நெருக்கத்தை, அன்பை, முக்கியத்துவத்தை அவ்வளவு அழகாக சொல்லியிருப்பார். ஒரு தாம்பத்யம் எப்படி இருக்கவேண்டும் என்பதற்கு இன்றளவும் எடுத்துக்காட்டு இந்தப்பாடல்தானே?

காலச் சுமைதாங்கி போலே மார்பில் எனைத் தாங்கி
வீழும் கண்ணீர் துடைப்பாய் அதில் என் விம்மல் தணியுமடி
ஆலம் விழுதுகள்போல் உறவு ஆயிரம் வந்துமென்ன
வேரென நீயிருந்தாய் அதில் நான் வீழ்ந்துவிடாதிருந்தேன்


என்று ஒவ்வொரு வார்த்தைகளிலும் அந்த உறவுக்குள் இருக்கும் நம்பிக்கையும் நேசமும் வெளிப்படும். சிவாஜிகணேசனும், பத்மினியும் தங்களுடைய அற்புதமான நடிப்பால் பாடலுக்கு உயிர் கொடுத்திருப்பார்கள். பாடலின் இறுதிக்கட்டத்தில்... `என் தேவையை யாரறிவார்...' என்று ஒரு சிறிய இடைவெளி வரும். பத்மினி இதுவரை வாழ்ந்த வாழ்க்கை அத்தனையும் அவ்வளவுதானா... என்பது போல் ஓர் ஏமாற்றப்பார்வையை வீசுவார்... அந்தப் பார்வையில் அவ்வளவு கேள்விகள் இருக்கும். `உன்னைப்போல் தெய்வம் ஒன்றே அறியும்' என்று பாடலை நிறைவு செய்வார் கவியரசர். இந்த வரிக்குப் பொருத்தமாக வேறு எந்த வரியையும் நம்மால் கற்பனைகூட செய்துபார்க்கமுடியாது. சிவாஜி அந்தக் கடைசி வரியைப் பாடி முடித்ததும்... பத்மினியின் முகத்தில் தோன்றும் நிம்மதியும் பெருமிதமும் நிறைவும் நம்மையும் ஒட்டிக்கொள்ளும். 
* * *


காலங்களில் அவள் வசந்தம்
கலைகளிலே அவள் ஓவியம்
மாதங்களில் அவள் மார்கழி
மலர்களிலே அவள் மல்லிகை

பறவைகளில் அவள் மணிப்புறா
பாடல்களில் அவள் தாலாட்டு
கனிகளிலே அவள் மாங்கனி
காற்றினிலே அவள் தென்றல்...


என்ற `பாவமன்னிப்பு' திரைப்படத்தில் வரும் பாடலில் காதலியைக் குறித்த வர்ணனையில் உச்சம் தொட்டவர். தன்னுடைய காதலியையோ / காதலனையோ தாண்டி சிறந்தது என்று வேறு எது இருக்கமுடியும். அவள் ஒவ்வொன்றிலும் எப்படி சிறப்பாக இருக்கிறாள் என்பதை எத்தனை நயமாகவும் இனிமையாகவும் எழுதியிருக்கிறார்.
* * *

வாழ்வின் கடினமான காலங்களைக் கடந்துவராத மனிதர்களே இருக்கமுடியாது. அப்போதெல்லாம் `நமக்குமட்டும் ஏன் இவ்வளவு கஷ்டம்' என்று மனசு கிடந்து தவிக்கும். விரக்தியில் இதயம் விம்மும். அப்படி `சுமைதாங்கி' படத்தில் ஜெமினிகணேசன் பாடுவதாக அமைந்த பாடல் இது. அவரைப் பார்த்து அவரது மனசாட்சி பாடும். நம்மைப் பார்த்து நம் மனசாட்சி கேள்விகேட்பதுபோல...

மயக்கமா கலக்கமா / மனதிலே குழப்பமா
வாழ்க்கையில் நடுக்கமா...
வாழ்க்கை என்றால் ஆயிரம் இருக்கும்
வாசல் தோறும் வேதனை இருக்கும்


துன்பங்கள் உனக்கு மட்டுமானதல்ல. இன்பமும் துன்பமும் கலந்ததுதான் வாழ்க்கை. இதற்கெல்லாம் கலங்கி நின்றுவிடக்கூடாது. ஏழை பணக்காரன் என்றெல்லாம் அது பார்ப்பதில்லை. அவரவர் நிலைக்குத் தகுந்தாற்போல் இன்பமும் துன்பமும் வரும். அப்படி வருகையில் கலங்கி நின்றுவிடக்கூடாது என்று அடுத்த வரிகளைத் தொடர்கிறார்.

வந்த துன்பம் எதுவென்றாலும் 
வாடி நின்றால் ஓடுவதில்லை...
எதையும் தாங்கும் இதயம் இருந்தால்
இறுதி வரைக்கும் அமைதி இருக்கும்


இதுவும் கடந்து போகும் என்றும், இன்னும் இன்னும் துன்பம் வரட்டும் தாங்குவேன் என்கிற நெஞ்சுறுதியும் இருந்தால் இறுதிவரைக்கும் அமைதி இருக்கும் என்கிறார். இதே கருத்தின் அடிப்படையில் `ஆட்டுவித்தால் யாரொருவர்' பாடலில் இரண்டு வரிகளை சொல்லியிருப்பார். `நான் இருக்கும் நிலையில் உன்னை என்ன கேட்பேன்... என்றும் நன்மை செய்து துன்பம் வாங்கும் உள்ளம் கேட்பேன்...' அதுதான் மிக உயர்ந்த நிலை.
* * *


கவியரசர் ஒரு கடல். கடந்த முப்பது வாரங்களில் நாம் பகிர்ந்துகொண்டது சிறு குழந்தையின் கையளவுதான். நல்ல இசைக்கும் பாடலுக்கும் முடிவென்பதே இல்லை. அவை மனித உணர்வுகளோடு நேரடித் தொடர்பு கொண்டவை. மனித இனம் இருக்கும் வரை தொடர்ந்திருக்கும். நேற்றைய தலைமுறை கேட்டு ரசித்ததை... இன்று நாம் உள்வாங்குகிறோம்... நாளை நம் தலைமுறையும் அனுபவிக்கும். அப்படி காலத்தால் அழியாத பாடல்களைத் தந்து சென்றிருக்கிறார் கவியரசர்.

அவரது பாடல்கள் இல்லாமல் தாலாட்டு இல்லை. மரணம் இல்லை. பண்டிகைகள் இல்லை. கொண்டாட்டம் இல்லை. சடங்குகளோ சம்பிரதாயங்களோ இல்லை. நம் வாழ்வோடும் கலாசாரத்தாடும், பண்பாட்டோடும் நியதிகளோடும் ஒட்டிப் பிறந்தவை கவியரசரின் பாடல்கள். அவரது மொழியில் சொல்லவேண்டும் என்றால்... `நான் நிரந்தரமானவன் அழிவதில்லை, எந்த நிலையிலும் எனக்கு மரணமில்லை!'

பயணத்தில் உடன் வந்தவர்களுக்கு நன்றியும் அன்பும்!
* * *

 

 

 

போட்டோ கேலரி

Therkil Irunthu Oru Suriyan - Kindle Edition


[X] Close