[X] Close

நலம் தரும் நவராத்திரி : மகாசக்தியை வணங்குவோம்!


navarathiri-spl

  • வி.ராம்ஜி
  • Posted: 09 Oct, 2018 11:15 am
  • அ+ அ-

வி.ராம்ஜி

மகாசக்தியாகிய அம்பிகையை வணங்கும் உன்னத வைபவமே நவராத்திரி.  புரட்டாசி என்றதும்  நினைவுக்கு வருவது நவராத்திரியே!

‘ராத்ரம்’ என்கிற வடமொழிச் சொல் நாளைக் குறிக்கும்.  பொதுவாகப் பகலில் செய்யப்படும் பூஜை இறைவனுக்கும், இரவில் செய்யப்படும் பூஜை இறைவிக்கும் உரியது. ஆனால், நவராத்திரி காலத்தில் இரண்டு வேளைகளில் செய்யப்படும் பூஜைகளும் இறைவிக்கே உரியது. அதாவது சக்திக்கு உண்டான பூஜை!

  சித்திரை மாதத்தில் வசந்த நவராத்திரி விரதமும், புரட்டாசி மாதத்தில் பாத்ரபத நவராத்ர விரதமும் கடைப்பிடிக்கப்பட்டுள்ளன. இந்த மாதங்களில் தோன்றிப் பரவும் கடுமையான வியாதிகளைக் குணப்படுத்தவே இந்த முறை தோன்றியது. இவற்றில் புரட்டாசி பாத்ரபத நவராத்திரி சிறப்பான விழாவாகக் கொண்டாடப்படுகிறது.

  நவராத்திரியின் முதல் 3 நாட்கள் துர்கை அம்சமாகவும், அடுத்த 3 நாட்கள் மகாலட்சுமியின் அம்சமாகவும், கடைசி மூன்று நாட்கள் சரஸ்வதியின் அம்சமாகவும் ஆவாஹனம் செய்யப்பட்டு பூஜிக்கப்படுகிறாள் தேவி.

 இந்த ஒன்பது நாட்களும் சக்தியை சூட்சுமமாக பாவித்து வழிபடுவதால் ‘நவராத்திரி’ என்ற சிறப்புப் பெயர் பெற்றது. நவராத்திரியின் பத்தாம் நாள் பூஜை மிகவும் முக்கியமானது. மூல நட்சத்திரம் உச்சமாக உள்ள 6 அல்லது 7-ஆம் நாளில் ஆவாஹனம் செய்யப்படும் சரஸ்வதிதேவிக்கு பத்தாம் நாளில் சிரவணம்- திருவோணம் நட்சத்திரம் உச்சமாகும்போது பூஜை நடத்தப்படுகிறது. இது சரஸ்வதி தேவியின் அருள் கிடைப்பதற்காகச் செய்யப்படும் ஆராதனை என்று சிலாகிக்கிறார்கள் சக்தி உபாஸகர்கள்.

   அப்போது, புத்தகங்களுக்குப் புத்துயிர் கொடுப்பதற்காகவே, நம் முன்னோர்களால் சரஸ்வதிதேவி ஆராதனை ஏற்படுத்தப்பட்டுள்ளது. புரட்டாசி அமாவாசைக்கு மறுநாள் பிரதமை திதியிலிருந்து நவராத்திரி ஆரம்பமாகிறது. அன்று கொலு வைப்பர். இதில் சக்தி ரூபத்தை முன்னிறுத்தி 9, 11, 21 படிகள் என்ற நிலையில் ‘கொலுக் காட்சி’ இடம் பெறுவது வழக்கம்.

  கொலுவில் கண்களைக் கவரும் பொம்மைகளுடன் கடவுளர் திருமேனி பொம்மைகள், விலங்குகள், பறவைகள், வீரர்கள், மகான்கள் போன்றோரின் உருவங்களும் வைக்கப்படுகின்றன. கொலுவிழாவின் ஒவ்வொரு நாளிலும் காலை, மாலை இரு வேளைகளிலும் சக்தி பூஜிக்கப்படுகிறாள். தவறாமல், பூஜிக்கவேண்டும் என்கின்றன ஞானநூல்கள். 

    கொலு தொடங்கிய நாள் முதற்கொண்டு, ஒவ்வொரு நாளும் சக்திக்கு விதவிதமாக நைவேத்தியம் செய்து, கொலுவைக்  காண வருபவர்களுக்கு அவற்றைப் பிரசாதமாக அளிக்கின்றனர். அப்போது பெண்கள் பாட்டுப் பாடியும், குழந்தைகள் தெய்வ வேடங்களை அணிந்தும் வழிபடுகின்றனர்.

  தற்போது கோயில்கள் மற்றும் சர்வோதய சங்கங்கள் பலவற்றிலும் கொலு வைத்து, தசரா என்ற பெயரில் நவராத்திரி விழா கொண்டாடுகின்றனர். பத்தாம் நாளன்று கோயில்களில் சிம்ம வாகனத்தில் சக்திதேவியானவள் ஊர்வலம் வருவாள். அப்போது சக்தியானவள், மகிஷனைக் கொன்றதை நினைவுறுத்தும் ‘அம்பு போடும்’ திருவிழா பல ஆலயங்களி பிரசித்தம்!

  புரட்டாசி மாதத்தில், நவராத்திரி காலத்தில்,  சக்தி உபாசனை செய்வதால் வியாதி, பயம், மரணம் போன்ற மனிதர்களுக்குத் தொல்லை தரும் தீய சக்திகள் விலகும் என்பது சத்தியம் என்கிறார்கள் ஆச்சார்யப் பெருமக்கள்!

போட்டோ கேலரி

Therkil Irunthu Oru Suriyan - Kindle Edition


[X] Close