[X] Close
 

சிட்டுக்குருவி சிட்டுக்குருவி சேதி தெரியுமா? - உலக சிட்டுக்குருவி தினம்


chittukuruvi-day

  • வி.ராம்ஜி
  • Posted: 20 Mar, 2018 14:10 pm
  • அ+ அ-

இன்றைக்கு உலக சிட்டுக்குருவி தினம் என்பது சிட்டுக்குருவிக்குத் தெரியாது.  அவ்வளவு ஏன்... இந்த தினம் தெரிகிறதே தவிர, சிட்டுக்குருவியை நாம் ஒருநாளேனும் ஒருபொழுதேனும் நினைத்துப் பார்க்கிறோமா என்றால்... அதுவும் இல்லை.

எண்பதுகளின் டீன் பருவத்தில் இருந்தவர்களுக்கு சிட்டுக்குருவி நன்றாகவே பரிச்சயம். 90கள் வந்த போது, சிட்டுக்குருவிகளைத் தேடுவோரும் குறையத் தொடங்கினார்கள். மொட்டைத் தலைக்கும் முழங்காலுக்கும் முடிச்சுப் போடலாமா என்று கேட்பார்கள். ஒருவகையில், முடிச்சுப் போடலாம்; போடமுடியும் என்றுதான் தோன்றுகிறது.

90களில் லேசாக எட்டிப்பார்த்து, 2000 த்தின் தொடக்கத்தில் நீட்டநீட்டமாய் நிற்கத் தொடங்கிய செல்போன் டவர்கள், நமக்கு வேண்டுமானால் பயன்பாட்டுக்கு உதவிக் கொண்டிருக்கலாம். ஆனால் செல்போன் டவர்களில் இருந்து வெளியாகும் கதிர்வீச்சுகளால், சிட்டுக்குருவிகள் தாக்கப்பட்டன. தெறித்துப் பறந்தன. சில, பறந்து விழுந்தன. மடிந்தன. இன்னும் சில... ‘விட்டாப் போதும்டா சாமீ’ என்று எங்கோ பறந்து சென்றன.

‘சிட்டுக்குருவி சிட்டுக்குருவி

சேதி தெரியுமா - என்னை

விட்டுப் பிரிஞ்ச கணவன்

இன்னும் வீடு திரும்பலை’

என்று  எங்கோ போய்விட்ட கணவனை நினைத்து, அந்தத் துயரத்தை சிட்டுக்குருவியிடம் கொட்டித் தீர்த்த நாயகிகள் உண்டு. சிட்டுக்குருவியைப் பார்ப்பதும் அதனுடன் பேசுவதும் தன் பிரச்சினைகளையெல்லாம் அந்தக் குருவியிடம் எடுத்துரைப்பதுமே மன பாரங்களைக் குறைப்பதாகப் பார்க்கப்பட்ட காலம் அது.

சிறுவயதில், எண்பதுகளில்... ஏதோ ஒரு விளம்பரம். வங்கி விளம்பரமோ என்னவோ அது. ஒரு குருவி வாயில் குச்சி ஒன்றை எடுத்துக் கொண்டு பறந்து சென்று, ஓர் மரத்துக் கிளையில் வைக்கும். இப்படியே குச்சியைக் கவ்வி, பறந்து, கிளையில் வைத்து கூடு கட்டியிருக்கும். அடுத்து, அந்தக் குருவி தம்பதி சமேதராக, குழந்தை குட்டிகளுடன் கூட்டில் குடியிருக்கும். ‘ஒரு குருவியே கூடு கட்டும் போது, நீங்கள் ஏன் வீடு கட்டக் கூடாது’ என்று வீடு கட்டச் சொல்லி, வீட்டுக்கு லோன் தருவதாகச் சொல்லி விளம்பரம் வந்ததாக நினைவு. இன்றைக்கு வீடு கட்ட வறண்ட ஏரிகள் இருக்கின்றன. பாவம்... கூடு கட்டுவதற்குத்தான் மரங்களும் இல்லை; குருவிகளும் காணோம்.

‘ஏ குருவி... சிட்டுக்குருவி

உன் ஜோடியெங்கே அதைக் கூட்டிகிட்டு

வந்து விட்டத்துல வந்து கூடு கட்டு.

பொல்லாத வீடு; கட்டு பொன்னான கூடு.

பொண்டாட்டி இல்ல வந்து

என் கூட பாடு’

என்று ‘வா... வந்து என் வீட்டில், என் வீட்டு விட்டத்தில் கூடு கட்டிக்கோ’ என்று குருவியை கூவிக்கூவி அழைத்த காலமெல்லாம் செல்போன் டவரேறிப் போச்சு. இன்றைக்கு பல வீடுகளில்,பிளாஸ்டிக் குருவிகளும் கூண்டுகளும் அழகுக்கு வைக்கப்படுகின்றன. கைத்தட்டினாலோ  ஏதேனும் சத்தம் கேட்டாலோ குருவிகள் சத்தம் போடுவது போல் அமைக்கப்பட்டிருக்கின்றன. சிட்டுக்குருவிகள் இப்படித்தான் இருக்கும் போல என்று குழந்தைகள் கொஞ்ச நேரம் கைத்தட்டி குருவியுடன் விளையாடிவிட்டு, பிறகு செல்போனில் விளையாடப் போய்விடுகிறார்கள்.

ஆண்ட்ராய்டு ஜாதிக்காரர்கள் என்றுதான் செல்போன் பயன்பாட்டாளர்களை சொல்லவேண்டும். இன்னும் நாற்பது ஐம்பது வருடத்தில், கோயில் இல்லாத ஊரில் குடியிருக்க வேண்டாம் என்பதெல்லாம் போய், செல்போன் டவர் இல்லாத ஏரியாவில் குடியிருக்கவேண்டாம் என்பார்கள். கோபுர தரிசனம் கோடி புண்ணியம்  என்பது போல, செல்போன் கோபுர தரிசனம் நான் ஸ்டாப் டவர் தரிசனம் என்றாகிவிடும். நீரின்றி அமையாது உலகு என்று சொன்னதை மறந்து, செல்போன் டவரின்றி அமையாது உலகு என்றாகிவிட்ட சூழலில், சூழலாவது சுற்றுச்சூழலாவது.

இத்தனையும் சொல்லிவிட்டு, ‘காக்கை குருவி எங்கள் ஜாதி’ என்று பாரதி பாடியதைச் சொல்லாமல் போனால், எங்கிருந்தோ சிட்டுக்குருவியின் அழுகுரல் செவி தொட்டு, மனதைத் தைத்து இம்சிக்கும்.

தொடர்புடைய செய்திகள்

 
 




Kalathin Vasanai - Kindle Edition


m7

d7

[X] Close