[X] Close
 

உதவிக்கரம் நீட்டிய யுஏஇ: இதயப்பூர்வ நன்றி சொன்ன கேரள முதல்வர்


people-of-kerala-will-not-forget-this-kind-gesture-shown-in-our-time-of-need

  • பாரதி ஆனந்த்
  • Posted: 18 Aug, 2018 11:48 am
  • அ+ அ-

கேரள மாநிலத்துக்கு உதவ ஐக்கிய அரபு எமீரகம் முன்வந்துள்ளது. யுஏஇ அரசின் உதவிக்கு கேரள முதல்வர் இதயப்பூர்வமாக நன்றி தெரிவித்திருக்கிறார்.

இது குறித்து அந்நாட்டு பிரதமர் ஷேக் முகமது பின் ரசீது அல் மக்தூம் தனது ட்விட்டரில், "இந்தியாவின் கேரள மாநிலம் மிக மோசமான மழை வெள்ளத்தில் சிக்கியுள்ளது. நூற்றுக்கணக்கானோர் இதில் மாண்டுள்ளனர். நூற்றுக்கணக்கானோர் வீடுகள் இழந்துள்ளனர். ஆயிரக்கணக்கானோர் இடம்பெயர்ந்து நிவாரண முகாம்களில் உள்ளனர். பக்ரீத் திருநாள் வேறு நெருங்குகிறது. இந்த வேளையில் இந்தியாவில் இருக்கும் நமது சகோதரர்களுக்கு உதவ மறக்கக்கூடாது. யுஏஇ அரசாங்கம் இங்குள்ள இந்திய சமூகத்தினருடன் இணைந்து உதவிகளை மேற்கொள்ளும். உடனே ஒரு குழு அமைக்கிறோம். இந்தக் குழுவுக்கு தாராளமாக உதவிகளை அளிக்க வேண்டுகிறோம். யுஏஇ அரசின் வெற்றி மொழியில் கேரள சகோதரர்களுக்குப் பங்கு உண்டு. ஆகையால் அங்கே வாடுபவர்களுக்கு உதவும் பொறுப்பு எங்களுக்கு இருக்கிறது" எனப் பதிவிட்டுள்ளார்.

இதயப்பூர்வ நன்றி:
யுஏஇ அரசின் இந்த உதவிக்கு கேரள முதல்வர் பினராயி விஜயன் இதயபூர்வமாக நன்றி தெரிவித்திருக்கிறார். இது குறித்து அவர் தனது ட்வீட்டில், "ஆழ்ந்த நன்றிகள். மேதகு ஷேக் முகமது பின் ரசீது அல் மக்தூம் அவர்களே தங்களது பெருந்தன்மையும் தயாள நெஞ்சமும் நெகிழச் செய்கிறது.

காலத்தினால் செய்த இந்த உதவியை கேரள மக்கள் இதை எப்போதுமே மறக்க மாட்டார்கள். ஷேக் முகமது, கேரளாவின் உற்ற நண்பர் என உறுதிப்படுத்தியிருக்கிறார்.

இதயத்தின் ஆழத்திலிருந்து நன்றியைத் தெரிவித்துக் கொள்கிறேன்" என ட்வீட் செய்திருக்கிறார்.

கேரளாவில் பெய்து வரும் கனமழைக்கு பாலக்காடு, மலப்புரம், கோழிக்கோடு, வயநாடு, இடுக்கி, பத்தனம்திட்டா, திருச்சூர், கண்ணூர், எர்ணாக்குளம் ஆகிய மாவட்டங்கள் கடுமையாக பாதிக்கப்பட்டுள்ளன. இதில் இடுக்கியில் மட்டும் வழக்கத்தை விட 84 சதவிகிதம் கூடுதல் மழை பெய்துள்ளது. இங்கு தமிழர்கள் வாழும் பகுதிகளில் பலத்த சேதம் ஏற்பட்டுள்ளது. தொடர் மழை மற்றும் வெள்ளத்தின் காரணமாக கொச்சி விமான நிலையம் வரும் 26-ம்தேதி வரை மூடப்பட்டுள்ளது.

நேற்று மாலை நிலவரம் வரை, கேரளத்தில் மழையால் ஏற்பட்ட வெள்ளம் மற்றும் நிலச்சரிவுக்கு பலியானவர்களின் எண்ணிக்கை 324-ஆக உயர்ந்துள்ளது.



Kalathin Vasanai - Kindle Edition


[X] Close