[X] Close

2018-19ஆம் நிதி ஆண்டில் வங்கிகளில் ரூ.71,500 கோடி நிதி மோசடி: ரிசர்வ் வங்கி அறிக்கையில் அம்பலம்


2018-19-71-500

  • kamadenu
  • Posted: 04 Jun, 2019 09:19 am
  • அ+ அ-

கடந்த நிதி ஆண்டில் (2018-19) ஏறக்குறைய 6,800 வங்கி மோசடி வழக்குகள் பதிவாகியுள்ளன. ரூ.71,500 கோடி அளவுக்கு நிதி மோசடிகள் நடந்துள்ளன என்று ரிசர்வ் வங்கி தெரிவித்துள்ளது.

2017-18-ம் நிதி ஆண்டில் மொத்தம் 5,916 வழக்குகள் பதிவாயின. இதில் ரூ. 41,167 கோடி அளவுக்கு மோசடி நிகழ்ந்துள்ளதாகத் தெரிவிக்கப்பட்டது. ஆனால் கடந்த நிதி ஆண்டில் நினைத்துப்பார்க்க முடியாத அளவுக்கு அதிகமாக மோசடி நிகழ்ந்துள்ளதாக ரிசர்வ் வங்கி அறிக்கையில் தெரிவிக்கப்பட்டுள்ளது.

வர்த்தக வங்கிகள் மற்றும் முக்கியமான நிதி நிறுவனங்களில் இந்த அளவுக்கு மோசடி நிகழ்ந்துள்ளது அதிர்ச்சியை ஏற்படுத்தியுள்ளது. இது முந்தைய ஆண்டைக் காட்டிலும் 73 சதவீதம் அதிகம் என்று தகவல் அறியும் உரிமை சட்டத்தின் கீழ் தாக்கல் செய்யப்பட்ட மனுவுக்கு அளித்த பதிலில் ஆர்பிஐ இந்த விவரங்களைத் தெரிவித்துள்ளது.

கடந்த 11 நிதி ஆண்டுகளில் மொத்தம் 53,334 வங்கி மோசடி வழக்குகள் நடைபெற்றுள்ளன. இதில் மொத்தம் ரூ.2.05 லட்சம் கோடி அளவுக்கு நிதி மோசடிகள் நிகழ்ந்துள்ளதாக ஆர்பிஐ தெரிவித்துள்ளது.

2008-09-ம் நிதி ஆண்டில் 4,372 வழக்குகள் பதிவாயின. அதில் மோசடி செய்யப்பட்ட தொகை ரூ.1,860.09 கோடியாகும். 2009-10-ம் நிதி ஆண்டில் ரூ.1,998 கோடி அளவுக்கு நிகழ்ந்த மோசடியில் 4,669 வழக்குகள் பதிவு செய்யப்பட்டுள்ளன.

2010-11-ம் நிதி ஆண்டில் 4,534 வழக்குகளில் ரூ.3,815 கோடியும், 2011-12-ம் நிதி ஆண்டில் 4,093 வழக்குகளில் ரூ.4,501 கோடியும் மோசடி செய்யப்பட்டுள்ளதாக ஆர்பிஐ அறிக்கை தெரிவிக்கிறது.

2012-13-ம் நிதிஆண்டில் மொத்தம் பதிவான வழக்குகள் 4,235. இதில் மோசடி செய்யப்பட்ட தொகை ரூ.8,590. இது 2013-14-ம் ஆண்டில் 4,306 வழக்குகளாகவும் அதில் மோசடியான தொகை ரூ.10,170 கோடியாகவும் உள்ளதாக தெரிவிக்கப்பட்டுள்ளது. 2014-15-ம் நிதி ஆண்டில் 4,639 வழக்குகளில் ரூ.19,455 கோடி மோசடி செய்யப்பட்டுள்ளதும் தெரியவந்துள்ளது.

2015-16-ல் 4,693 வழக்குகளில் ரூ. 18,698 கோடியும், 2016-17-ல் 5,076 வழக்குகளில் ரூ. 23,933 கோடியும் மோசடி செய்யப்பட்டுள்ளதாக ஆர்பிஐ அறிக்கை தெரிவிக்கிறது. ரிசர்வ் வங்கியில் வங்கிகள் தாக்கல் செய்த மோசடி வழக்குகளின் விவரங்கள் அடிப்படையில் இந்தப் பட்டியல் தயாரிக்கப்பட்டுள்ளது. இது தொடர்பாக சம்பந்தப்பட்ட வங்கிகள் குற்றவியல் வழக்கு மற்றும் அது சார்ந்த அமைப்புகளில் வழக்குகளைப் பதிவு செய்துள்ளன. இந்த வழக்குகளில் எவற்றின் மீது நடவடிக்கைகள் எடுக்கப்பட்டுள்ளன, அவற்றின் நிலை எந்த அளவுக்கு உள்ளது என்ற விவரம் தற்போதைக்கு இல்லை என்று ரிசர்வ் வங்கி தெரிவித்துள்ளது.

இந்த மோசடி வழக்குகளில் வைர வியாபாரி நீரவ் மோடி, அவரது உறவினர் மெகுல் சோக்ஸி மற்றும் தொழிலதிபர் விஜய் மல்லையா ஆகியோர் கடன் பெற்று நாட்டை விட்டு வெளியேறி ஏமாற்றிய தொகையும் அடங்கும் என்று தெரிகிறது.

மிகப் பெரிய மோசடி வழக்குகளை லஞ்ச ஒழிப்பு மற்றும் மத்திய கண்காணிப்பு ஆணையம் (சிவிசி) உள்ளிட்ட அமைப்புகளின்கீழ் விசாரணைக்கு உட்படுத்தப்பட்டுள்ளன.

வங்கி மோசடிகள் நிகழ்ந்த விதம், அதில் சம்பந்தப்பட்ட தொகை, கடனாக அளிக்கப்பட்டது, தனி நபர் அல்லது நிறுவனங்களுக்கு வழங்கப்பட்டது, அதில் எத்தகைய விதி மீறல் அல்லது மோசடி நபர் எந்த வகையான விதிகளை தனக்கு சாதகமாக்கிக் கொண்டு மோசடி செய்துள்ளார் என்ற விவரங்கள் ஆராயப்படும். இதன் மூலம் வங்கிக் கடன் வழங்குவதில் மோசடிக்காரர்கள் சாதகமாக பயன்படுத்திக் கொண்ட அம்சங்கள் கடுமையாக்கப்படும் அல்லது முற்றிலுமாக நீக்கப்படும்.

மோசடி நடைபெற்ற துறைகளை மொத்தம் 13 பிரிவுகளாக பிரித்துள்ளனர். ஜெம் அண்ட் ஜூவல்லரி, உற்பத்தித் துறை, தொழில் துறை, விவசாயம், ஊடகம், விமானத் துறை, சேவைத் துறை, திட்டத் துறை, காசோலைக்கு கமிஷன் அடிப்படையில் மோசடி, வர்த்தகம், தகவல் தொழில்நுட்பம், ஏற்றுமதி வர்த்தகம், நிரந்தர வைப்பு கணக்கு, கேட்புக் கடன் மற்றும் கடன் உத்தரவாத கடிதம் உள்ளிட்ட பிரிவுகளில் இவை பதிவு செய்யப்பட்டுள்ளன.

வழக்குகளை விசாரிக்கும் சிவிசி, அளிக்கும் பரிந்துரைகள் இதுபோன்ற வங்கி மோசடிகளை இனிவரும் காலங்களில் நடக்காத வகையில் தடுக்க செயல்படுத்தப்படும் என ஆர்பிஐ தெரிவித்துள்ளது. கடந்த ஆண்டு (2018) சிபிஐ பொதுத் துறை வங்கிகளைச் சேர்ந்த இரண்டு அதிகாரிகள் மீதும், ஐடிபிஐ வங்கி முன்னாள் தலைவர் மீதும் வழக்குப்பதிவு செய்தது. அத்துடன் ஏர்செல் நிறுவனத்தின் முன்னாள் நிறுவனர் சிவசங்கரன் மற்றும் அவரது மகன் நிர்வகிக்கும் நிறுவனங்கள் மீதும் வழக்குப்பதிவு செய்யப்பட்டது. ஐடிபிஐ வங்கியில் ரூ. 600 கோடி கடன் மோசடிக்காக இந்த வழக்குகள் பதிவு செய்யப்பட்டன.

2010-ம் ஆண்டிலிருந்து 2014-ம் ஆண்டு வரை ஐடிபிஐ வங்கியில் முக்கிய பொறுப்பு வகித்த 15 வங்கி அதிகாரிகள் மீது எப்ஐஆர் பதிவு செய்யப்பட்டுள்ளது.

சிபிஐ சமீபத்தில் வெளியிட்ட எப்ஐஆரில் ஐடிபிஐ வங்கி நிர்வாக இயக்குநர் கிஷோர் காரத், சிண்டிகேட் வங்கியின் முன்னாள் துணை பொது மேலாளர் மெல்வின் ரெகோ, ஐடிபிஐ வங்கியின் முன்னாள் தலைவர் மற்றும் நிர்வாக இயக்குநர் எம்.எஸ். ராகவன் ஆகியோரது பெயர்களும் சேர்க்கப்பட்டுள்ளன.

அதிக தொகை உள்ள நிதி மோசடி வழக்குகளை சிபிஐ மற்றும் அமலாக்கத் துறை (இடி) இரண்டும் இணைந்து விசாரித்துவருகின்றன.

போட்டோ கேலரி

Hindu Tamil Thisai - Kindle Edition


[X] Close