[X] Close
 

தெ.ஆப்பிரிக்கா - ஆஸ்திரேலியா முதல் டெஸ்டில் இன்று மோதல்


sa-and-aus-test-today

  • Team
  • Posted: 01 Mar, 2018 05:27 am
  • அ+ அ-

தென் ஆப்பிரிக்கா - ஆஸ்திரேலியா அணிகள் இடையிலான முதல் டெஸ்ட் போட்டி இன்று பிற்பகல் 1.30 மணிக்கு டர்பனில் தொடங்குகிறது.

ஸ்டீவ் ஸ்மித் தலைமையிலான ஆஸ்திரேலிய கிரிக்கெட் அணி 4 டெஸ்ட் போட்டிகள் கொண்ட தொடரில் விளையாடுவதற்காக தென் ஆப்பிரிக்கா சென்றுள்ளது. இரு அணிகள் இடையிலான முதல் டெஸ்ட் டர்பன் மைதானத்தில் இன்று தொடங்குகிறது. ஆஸ்திரேலிய அணி ஆஷஸ் டெஸ்ட் தொடரையும், தென் ஆப்பிரிக்க அணி இந்தியாவுக்கு எதிரான டெஸ்ட் தொடரையும் வென்ற நிலையில் இந்தத் தொடரை சந்திக்கின்றன. தரவரிசையில் 2-வது இடத்தில் உள்ள தென் ஆப்பிரிக்க அணியும், 3-வது இடத்தில் ஆஸ்திரேலிய அணியும் மோதும் இந்த டெஸ்ட் தொடர் மிகுந்த எதிர்பார்ப்பை ஏற்படுத்தி உள்ளது.

இரு அணியும் வேகப்பந்து வீச்சை பிரதானமாக நம்பி உள்ளதால் வலுவான போட்டி நிலவக்கூடும். கடந்த 2016-ம் ஆண்டு ஆஸ்திரேலிய மண்ணில் அந்த அணிக்கு எதிரான டெஸ்ட் தொடரை தென் ஆப்பிரிக்கா 2-1 என வென்றிருந்தது. இதற்கு இம்முறை ஆஸ்திரேலிய அணி பதிலடி கொடுக்க முயற்சிக்கும். மேலும் தென் ஆப்பிரிக்க மண்ணில் ஆஸ்திரேலிய அணி இதுவரை டெஸ்ட் தொடரை இழந்ததில்லை. ஆஷஸ் டெஸ்ட் தொடரின் கடைசி ஆட்டத்தில் களமிறங்கிய அதே அணியே இன்று தொடங்கும் முதல் டெஸ்ட் போட்டியில் களமிறங்கும் என ஸ்டீவ் ஸ்மித் தெரிவித்துள்ளார்.

தென் ஆப்பிரிக்க அணியை பொறுத்தவரையில் இந்திய அணிக்கு எதிரான தொடரில் 4 பிரதான வேகப்பந்து வீச்சாளர்களுடன் களமிறங்கியது. ஆஸ்திரேலிய அணி வேகப்பந்து வீச்சை சிறப்பாக எதிர்கொள்ளும் என்பதால் இம்முறை தென் ஆப்பிரிக்க அணி பேட்டிங்கை வலுப்படுத்தும் விதமாக கூடுதலாக ஒரு பேட்ஸ்மேனுடன் போட்டியை அணுகக்கூடும் என கருதப்படுகிறது. 3 வேகப்பந்து வீச்சாளர்களுடன் களமிறங்கும் பட்சத்தில் ரபாடா, பிலாண்டர், மோர்னே மோர்கல் ஆகியோர் இடம் பெறுவார்கள். காயத்தில் இருந்து மீண்டுள்ள டு பிளெஸ்ஸிஸ் மீண்டும் அணியை வழிநடத்த உள்ளார். இதேபோல் உடல் தகுதியை பெற்றுள்ள டி வில்லியர்ஸூம் களமிறங்க உள்ளார். குயிண்டன் டி காக்கின் பேட்டிங் பார்ம் கவலை அளிக்கும் நிலையில் ஹென்ரிச் கிளாசென் களமிறங்க வாய்ப்பு உள்ளது.

ஆஸ்திரேலிய லெவன்: ஸ்டீவ் ஸ்மித் (கேப்டன்), டேவிட் வார்னர், கேமரூன் பான் கிராஃப்ட், உஸ்மான் கவாஜா, ஷான் மார்ஷ், மிட்செல் மார்ஷ், டிம் பெயின், பாட் கம்மின்ஸ், மிட்செல் ஸ்டார்க், நாதன் லயன், ஜோஸ் ஹசல்வுட். - ஏஎன்ஐ

தொடர்புடைய செய்திகள்

 




தமிழ் திசை புத்தகங்கள் - Kindle Edition


[X] Close